“Нийслэлийн уугуул иргэдийн нийгэмлэг”, “Улаанбаатар форум” ТББ болон “Монголын архитектуруудын эвлэл”-ийн төлөөлөл өнөөдөр мэдээлэл хийлээ. Тэд хуучны түүхэн дурсгалт барилга байгууламж, олон нийтийн зам талбайг хүчээр сүйтгэн зөвшөөрөлгүй барилга барьж байгаад ихээхэн дургүйцэж, цаашдаа иргэдийн эрх ашгийн төлөө тэмцэхээ илэрхийлэв.
Хуульч Д.Батсүх “Энэ ажлыг Монголын үндэсний барилгийн корпораци гэх хэсэг бүлэг нөхөд гардан зохион байгуулдаг. Хотод хаана л зай чөлөө байна, тэнд барилга барих захирамж гаргуулж авдаг. “Эко констракшин”, “Гандирс” гэх компаниуд бүтээн байгуулалт нэрээр сүйтгэж байна. Энэ асуудал найман жил иргэний шүүхээр явсан. 2016 оны А501 захирамжаар Д.Цэрэндоржийн гудамжанд 1.7 га-д газар доорх нүхэн гарц барих нэрээр барилга барих эрх олгосон. Энэ захирамж нь Монгол Улсад мөрдөгдөж байгаа маш олон хуулийг зөрчсөн. Үндсэн хуулиас эхлээд Газрын тухай хууль, Захиргааны үндсэн хууль, Хот суурин газрыг дахин хөгжүүлэх хууль, Төрийн албаны хууль, Авлигийн эсрэг хууль, НИТХ-ын тогтоол зэргийг ноцтой зөрчсөн” хэмээн хуульзүйн үндэслэлийг тайлбарлав.
Харин Улаанбаатар иргэний форумын тэргүүн Б.Долгион энэ асуудалд ихээхэн бухимдаж буйгаа илэрхийлэв. Тэрбээр “Шинээр бүтээн байгуулалтын загварын зураг гарахад миний босголцсон Битлзын хөшөө байгаагүй. Би Улаанбаатар хотын уугуул иргэн, 40 мянгатын унаган хүүхэд энэ бол миний төрсөн нутаг. Улаанбаатар хот маань бидний соёл, түүх, уламжлалт ёс, шинжлэх ухаан, зэрэг бүх зүйлийн гол төв. Би нийтийн зам талбай болоод хүмүүсийн амралт чөлөөт цагаа өнгөрөөдөг цэцэрлэгт хүрээлэнгүүдийг сүйтгэхийг эсэргүүцэн 1990-ээд оноос хойш их ярьсан ч хүмүүс тоогоогүй.
Үндсэндээ бид хоёр, гуравхан хоттой, бас аймгийн төвүүд байна. Энэ газрууддаа бүтээн байгуулалт нэрээр хуучны барилгуудыг сүйтгэж нураагаад байх юм. Үүний цаана мөнгө харсан хэдхэн хүн байна. Түүх, дурсгалт барилгаа битгий оролдооч ээ. Мөнгө нь багтаж ядаад байгаа юм бол тэр Баянхошуугаа янзлаач ээ” гэж ярилаа.
Энэ үеэр 44,45 дугаар байрны оршин суугчдын төлөөлөл барилгуудыг мэргэжлийн бус хүмүүс нурааснаас үүдэн орон сууцанд цууралт үүссэн гэдгийг хэлээд галын машин ч орох боломжгүйгээр орц гарцыг хаасан хэмээн гомдол мэдүүлэв.
З.Жамбал
Уншиж байна |