УИХ дахь АН-ын бүлгийн хуралдаан өндөрлөлөө. Хуралдаанаар хэлэлцсэн асуудлын талаар УИХ дахь АН-ын бүлгийн дарга Д.Эрдэнэбат мэдээлэл хийлээ. Тэрбээр:
-АН-ын бүлэг ээлжит хуралдаанаараа дөрвөн асуудлыг хэлэлцлээ. Боловролын тухай, бага, дунд боловсролын тухай хуульд өөрчлөлт оруулах төслийг УИХ энэ долоо хоногт хэлэлцэнэ. Энэ хуулийн төслөөр сум, дүүргийн Засаг дарга нар сургууль цэцэрлэгийн Засаг дарга нар томилдог байхаар оруулж ирж байна. АН-ын бүлэг энэ хуулийн төслийг дэмжиж байгаа.
Монгол Улсын Ерөнхий сайд У.Хүрэлсүхэд шаардлага хүргүүлэх нь зүйтэй гэж үзлээ. У.Хүрэлсүхийн Засгийн газар бүрдээд 6 сар гаруй хугацаа өнгөрч байна. Засгийн газрын зарим сайд нарын үйл ажиллагаа ард иргэдэд хүндрэл учруулж байна. Сангийн сайд Ч.Хүрэлбаатар АТГ-т шалгагдаж байгаа. Энэ хүн Төсвийн тухай хуулийн зарим заалтыг зөрчиж, 180 орчим тэрбум төгрөгийг төсвийн орлогод оруулалгүй хууль зөрчсөн. Мөн ХЗДХ-ийн сайд Ц.Нямдоржтой холбоотой. Ц.Нямдорж төсвийн хуулийг зөрчсөн. Түүнээс гадна Ц.Нямдоржтой холбоотой яригдаад байгаа түрээсийн байрны асуудал "Эрдэнэт"-ийн 51 хувьтай холбоотой хамраалтай зүйл гэж харж байна. ҮХЦ үүнийг АТГ-аар шалгуулах нь зүйтэй гэж үзсэн юм билээ. Мөн "Оюутолгой"-н гэрээтэй холбоотой асуудлыг дахин шалгаж, дүгнэх хэрэгтэй байна. Ажлын хэсгийг З.Нарантуяа ахална. "Эрдэнэт" үйлдвэрийн 51 хувьтай холбоотой шалгаж, дүгнэлт гаргах ажлын хэсгийг Б.Пүрэвдорж ахална. Ажлын хэсгүүд тавдугаар сарын 20 гэхэд дүгнэлтээ гаргана гэлээ. Тэрбээр мэдээлэл хийснийхээ дараа сэтгүүлчдийн сонирхсон асуултад хариуллаа.
-УИХ дахь АН-ын бүлэг Үндсэн хуульд өөрчлөлт оруулах асуудалд ямар байр суурьтай байна вэ?
-Үндсэн хуульд өөрчлөлт оруулах шаардлага байгаа. Гэхдээ ямар зүйлд өөрчлөлт оруулах талаараа бүх улс төрийн намууд нэгдсэн байр суурьт хүрэх ёстой. Түүнээс бус УИХ дахь МАН-ын бүлгийн 65 гишүүний асуудлаар шийдэхгүй.
-Хүүхдийн мөнгөний асуудлаар хоёр хууль хэлэлцэгдэж байна. АН Ерөнхийлөгчийн өргөн барьсан хуулийг дэмжиж байна уу?
-Засгийн газар Хүүхдийн мөнгөн тэтгэмжийг олгох хүрээг нэмэгдүүлнэ гэж байна. ОУВС-гийн зөвшөөрлөөр олгоно гэдэг бол худлаа. Сонгууль дөхөхөөр хүүхдийн мөнгийг 100 хувьд өгнө. Тэгээд сонгуулиар нэр зүүх гэж байна. Ерөнхийлөгч бүх хүүхдэд хүүхдийн мөнгө олгох хуулийн төсөл санаалчилсан. Энэ хоёр хуулийг хамтад нь хэлэлцэх хэрэгтэй.
Н.Энх