ОХУ-ын эрх баригчид хамгийн сүүлийн үеийн зенитийн пуужингийн цогцолбор болох “С-500”-г амжилттай туршсан талаар “Ройтерс” агентлаг мэдээллээ.

Уг мэдээллийн анхлан АНУ-ын Тагнуулын байгууллагынхан тогтоожээ. Америкийн “CNBC” сувгийнхан тагнуулын мэдээллээс иш татан нийтэд мэдээсэн байна.

Туршилтын явцад “С-500” систем нь 481,2 км-ийн зайд байсан байг онож устгасан гэнэ.  Өмнөх туршилтаасаа 80.5 км-ээр хол замыг туулжээ.

С-500 цогцолбор нь С-400-гийн оронд суурилуулахаар төлөвлөж буй систем бөгөөд 25 жилийн хугацаанд ашиглах боломжтой юм. ОХУ-ын Батлан хамгаалахын сайд Сергей Шойгу “2020 оноос уг системийг зэвсэглэлд нийлүүлж эхэлнэ” гэж мэдэгдлээ.

“С-500 болон С-400-г Нижегород хотын машины үйлдвэрт үйлдвэрлэж эхэлсэн” хэмээн энэ оны эхээр ОХУ-ын Засгийн газрын Шадар сайд Дмитрий Рогозин мэдэгдэж байжээ.

Б.Дэлгэрцэцэг