АТГ-ын Олон нийтийн зөвлөлөөс ээлжит мэдээллээ өнөөдөр хийлээ. Олон нийтийн зөвлөлийн дарга Г.Баасан “АТГ Х.Энхжаргалын хувийн компани” болсон гэв. Тэрбээр энэ тухайгаа “Бид УИХ-ын дэргэдэх төрийн тусгай байгууллагад сууж байгаа. Энэ байгууллагад төрийн албаны таван төрлийн мэргэшлийн шалгалт өгч, 60-аас дээш оноо авсан шилдгүүд ажилладаг гэж монголчууд харж байгаа. Гэтэл энд өндөр шалгуур тавьдаг хувийн компиас дор байна.
Төрийн албаны зөвлөлөөс лавлагаа авахад “АТГ-аас сонгон шалгаруулалтын талаар ямар нэг мэдээлэл ирээгүй. Төрийн албаны зөвлөлөөс шийдвэр гараагүй” гэсэн хариу хүлээж авсан.
АТГ-д шинээр болон шилжин ажилд орох гэж байгаа хүнээс бичиг баримтын, бие бялдарын, Ерөнхий мэдлэгийн, ур чадварын шалгалт авч, эцэст нь ярилцлага хийдэг. Шалгалтын дүн өдөртөө гарч, Төрийн албаны зөвлөлд очих ёстой. Төрийн албаны зөвлөл хянаж үзээд, АТГ-ын даргад ирүүлдэг байтал энэ үйл ажиллагаа явагдаагүй байна.
Шалгалтад ороогүй, мэргэжлийн бус хүмүүс АТГ-т ажиллаж байгаа нь дэмий суугаад, төсөв завшиж байна гэсэн үг. Х.Энхжаргал гэдэг хүн төрийн хуулийг уландаа гишгэжээ. Авлигачдын шахааны хүмүүсийг АТГ-т ажиллуулдаг юм биш байгаа?!” хэмээн хардаж буйгаа хэллээ.
УИХ-аас АТГ-ын бүтэц орон тоог 172 албан хаагчийн бүрэлдэхүүнтэйгээр баталсан аж. 2010 оноос хойш орсон хүн бүр Төрийн албаны журмын дагуу шалгалт өгч, орох ёстой. Гэтэл АТГ-аас нэг ч удаа энэ шалгалтыг зохион байгуулаагүй гэдгийг Төрийн албаны зөвлөлөөс мэдэгдсэн гэдгийг Олон нийтийн зөвлөлийн гишүүн И.Мөнхжаргал ярив.
Б.Учрал
Уншиж байна |