АСЕМ-ын дээд хэмжээний уулзалт 2016 онд манай улсад болсон. Уг уулзалтад зориулан “Тэнгэрийн өрх” хөшөөг бүтээж, Сүхбаатарын талбайн урд цэцэрлэгт байрлуулсан юм.
Гэвч уг хөшөө нь өдгөө эзэнгүй байгааг Үндэсний аудитын газраас мэдээллээ. АСЕМ-ын үйл ажиллагаанд хийсэн аудитын дүгнэлтийг танилцуулах үеэрээ Ерөнхий аудиторын орлогч С.Оюунбилэг “Тэнгэрийн өрх” хөшөөг “Энхтайваны хонх”-оор солиход 668.7 сая төгрөгийн зардал гарсан байна. Гэвч энэ санхүүг батлах анхан шатны баримт, ажил хүлээлцсэн акт байдаггүй. Тиймээс одоо ч хөшөөний эзэмшигч, хариуцагч нь тодорхойгүй байна” гэсэн мэдээллийг өглөө.
“Тэнгэрийн өрх” хөшөөг Урчуудын эвлэлийн гишүүн зураач Адъяабазарын Чадраабал бүтээсэн байна. Тэрбээр энэ бүтээлдээ таван тивийн олон үндэстэн эх дэлхийгээ хайрлан хамгаалах, хүн төрөлхтний шинжлэх ухааны нээлт ололт, оюун санааны эв хамтын ажиллагааны харилцаа холбоог дүрсэлсэн аж.
Б.Учрал