Цагдаагийн ерөнхий газар, Гэр бүл хүүхэд залуучуудын газраас хамтран хүүхдийг гэмт хэргээс урьдчилан сэргийлэх ажлын талаар мэдээлэл хийлээ.

Монгол Улсын хэмжээнд 1 сая 27 мянган хүүхэд амьдарч байна. Өнгөрөгч 2017 оны статистик мэдээгээр 3553 өнчин хүүхэд амьдарч байгаа бол, 31 асрамжийн байгууллагад 1019 хүүхэд амьдарч байна.

Улсын хэмжээнд 2017 онд 1700 орчим хүүхэд гэмт хэргийн улмаас хохирч, 127 хүүхэд амь насаа алдсан бөгөөд үүний 50 орчим хувь нь зам тээврийн ослоор амь эрсэджээ. Мөн бага насны хүүхдийн эсрэг үйлдэгдэж байгаа бэлгийн хүчирхийлэл 187 бүртгэгдсэн бол энэ он гарсаар 68 тохиолдол бүртгэгдсэн байна.

Улсын хэмжээнд өнгөрөгч онд 394 хурдан морины уралдаан зохион байгуулагдсан. Энэхүү уралдаанд 10435 хүүхэд оролцож, 629 хүүхэд мориноос унаж, 169 хүүхэд хөнгөн болон, хүнд гэмтэл авч, гурван хүүхэд хэзээ ч эдгэрэхгүй насан туршийн хөгжлийн бэрхшээлтэй болж, хоёр хүүхэд амь насаа алджээ.

2017 онд 16800 хос гэр бүлээ бүртгүүлсэн бол 4100 орчим хос шүүхийн журмаар гэр бүлээ цуцлуулжээ. Жил тусам гэр бүлээ цуцлуулж буй хосын тоо нэмэгдэж байгаа тухай тоон судалгааг Гэр бүл, хүүхэд, залуучууын хөгжлийн газрын Хууль эрх зүй, хамтын ажиллагааны газрын дарга А.Энхбаатар танилцууллаа.

Г.Тэгшсүрэн