Баянзүрх дүүргийн 21-р хороонд байрлах “Очир” төвийн зочид буудлын өрөөнд өнгөрөгч 2017 оны наймдугаар сарын 22- 23-нд шилжих шөнө 13 настай охин амиа алдсан. Уг хэрэгт Д.Жавхлан, М.Амарболд нарыг сэжиглэн шалгаж буй. Баянзүрх дүүргийн эрүүгийн анхан шатны шүүхэд өнөөдөр Д.Жавхлан, М.Амарболд нарын шүүх хурал болж байна.

Шүүх хурал хаалттай явагдаж байгаа бөгөөд хохирогчийн талаас гурван өмгөөлөгч болон охины аав оролцож байгаа юм. Тэд гэмт этгээдүүд гэм буруугаа хүлээн зөвшөөрөхгүй, хохирогчийг буруутгасан хэвээр байгааг шүүх хурлын завсарлагааны үеэр мэдэгдлээ.

Хохирогчийн аав Т.Лхагвасүрэн “Хоёр яллагдагч хэргийн үйл явцыг ярилаа. Тэд миний охин өөрөө архи уугаад, хүчиндүүлчихсэн мэт юм ярьж байна. Д.Жавхлан нь би яагаач үгүй, М.Амарболд охинд архи өгсөн гэлээ. Харин М.Амарболд нь би хүчиндсэн, унтсан нь үнэн. Гэхдээ архи өгөөгүй, зодоогүй гэдэг зүйлийг сая ярьж байна. Буудлын өрөөнөөс архины нэг шил олдсон. Яллагдагчид охиныг минь 0.75 грамм архийг ганцаараа уусан. Бид хоёр тасраад уначихсан байсан  мэт юм ярилаа. Гэтэл хор судлалын үндэсний төвийн даргын хэлж байгаагаар энэ нь байж боломгүй зүйл юм байна. Яллагдагчын талаас хоёр удаа миний биед халдсан. Гэртээ амарч байтал нэг үл таних Оюунчимэг гэх эмэгтэй орж ирээд “Танай охин заяа муутайдаа хүнд хүчиндүүлж нас барсан. Хохино” гээд нүүр ам руу маажиж, цохисон. Дараа нь Д.Жавхлангийн өвөө гэх хүн “Би 16 сая төгрөгөөр өмгөөлөгч авсан. Та нар юу ч олж долоож чадахгүй. Хүүгээ би ялгүй гаргаж авна гэсэн” хэмээлээ.

Хохирогчийн өмгөөлөгч Г.Батбаяр “Нотлох баримт хангалттай байгаа. Хэрэгтнүүд гэмт хэргээ нуун далдлах зорилгоор амьсгалыг бүтэлтэд оруулж, архи шахаж санаатайгаар амь насыг хохироосон гэж үзэж байгаа. Гэтэл хохирогчийг архичин байсан мэт үзээд байна. Хаалттай шүүх хурал учраас илүү дэлгэрэнгүй мэдээлэл өгөх боломжгүй” гэв.

Шүүх хуралд хэрэг гарсан “Очир” төв иргэний хариуцагчаар оролцох ёстой байсан ч тус төвийн удирдлагууд ирээгүй байна. Тус төвийн үйл ажиллагаа хэвийн үргэлжилж байгаа. Зөрчлийн тухай хуулиар “Очир” төвд 200-300 мянган төгрөгийн торгууль ногдуулсан болохыг хохирогчийн аав хэлж байлаа.

Г.Сүрэн