Тайландын “Там Лаунг” агуйд 17 өдрийн турш байсан өсвөрийн хөлбөмбөгийн шигшээ багийн 12 гишүүн болон дасгалжуулагчийг аврагчид амжилттай авраад буй юм.
Хөвгүүдийг эмнэлэгт хүргэж, яаралтай эмчилгээ хийж байна. Тэгвэл Тайландын албаныхан эмнэлэгт байгаа хөвгүүдийн видео бичлэгийг нийтийн хүртээл болгожээ.
Бичлэгийн эхэнд Адул гэх хүү “Сайн уу. Миний бие сайн байна” гэсэн бол нэгэн хүү “Бидэнд санаа зовох хэрэггүй. Учир нь бид сайн байна” гэж хэллээ.
Тус багийн хамгийн бяцхан гишүүн 11 настай Титан “Биднийг аварсан аврах албаныханд гүнээ талархаж байна” хэмээн сэтгэгдлээ хуваалцжээ. Харин Миг гэх хүү “Би яг одоо хүчтэй байна” гэсэн бол Нот гэх хүү “Миний эрүүл мэнд маш сайн байгаа” гэлээ.
Дом гэх хүү “Биднийг аварсан бүх хүмүүст талархлаа” гэсэн бол Пог “Биднийг аврах ажиллагаанд оролцсон бүх хүмүүст талархаж байна” гэж хэлжээ.
Хөвгүүд олон өдөр хоног хоол идээгүй бөгөөд эмнэлэгийнхэн эхний ээлжинд тэдэнд зөвхөн тусгай хоолыг өгч буй гэнэ. Хөвгүүдийн ихэнх нь эмнэлэгээс гараад түргэн хоол идэхийг хүсч буйгаа хэлжээ.
Б.Дэлгэрцэцэг
Уншиж байна |