Багшийн мэргэжил дээшлүүлэх институтийн нийт ажилтан албан хаагчид ажлаас чөлөөлөгдөх тухай мэдэгдэх хуудас хүлээн авсан талаар тус байгууллагын Байгалийн ухааны цахим сургалт хариуцсан арга зүйч Б.Цогбадрахтай ярилцлаа
-Танай институтийн ажилчид бүгд халагдах болсон тухай сонслоо. Хэний тушаал, шийдвэр юм бол оо?
-Манай БМДИ Засгийн газрын тогтоолоор 2012 дахин байгуулагдсан. Манай байгууллага 70 хүний орон тоотой. Энэ оны дөрөвдүгээр сард Сүрэнчимэг гэдэг шинэ захирал буюу захирлын ажлыг орлон гүйцэтгэгчтэй болсон. Гэтэл сарын өмнөөс шинэ захирал маань дэд захиралаас бусад бүх ажилтанд ажлаас халах мэдэгдэл өгөөд байна.
-Ажлаас халах болсон үндэслэл нь юу юм бол?
-Сүрэнчимэг ажилчдыг халаад шинээр зохиосон, шинэ нэр томъёотой ажлын байрандаа дахин сургаж, шалгалт аваад тэнцвэл ажилд авах юм гэнэ. Сүрэнчимэг сургалт явуулдаг нэг ТББ удирддаг. Мэргэшсэн багш, аргазүйч нарыг ажлаас халаад оронд нь өөрийн ТББ-ын хүмүүсээ ажилд авах зорилготой гэж харж байна. Тэгэхээр БМДИ-т нэг их төлөвлөлт, менежмент ярьсан хүмүүс ажилд орох гэж байна.
-Халагдах тухай мэдэгдэл хүлээж авсан ажилчид зарласан ажлын байранд шалгалт өгөөд тэнцвэл ажилтайгаа үлдэх боломжтой юм биш үү?
-Манай институт 2000 гаруй багшид үндсэн сургалт, аргазүй явуулж ирсэн. Гэтэл одоо математик, мэдээлэл зүй гэх тэс өөр хоёр хичээлийг нэгтгэж, нэг ажлын байр зарлачихаад байна. Тэгэхээр энэ хоёр хичээлийг заадаг байсан хоёр аргазүйчийн нэг нь ажилгүй болж, нөгөө нь Сүрэнчимэгийн шалгалтад тэнцвэл ажилдаа эргэж орох юм. Тэгэхээр шалгалтад нь тэнцээд ажилдаа эргээд орсон ч нийт ажилчдын 50 гаруй хувь нь шууд ажилгүй болоход хүрээд байна. Би дунд сургуулийн физикийн багшаар ажиллаад явчих санаатай. Гэтэл залуу багш нар маань “Бид яах вэ” гэдэг саналыг тавьж, бид уулзаж ярилцлаа. Би ахмад багш нарын тоонд орчихдог болохоор мэддэггүй байж. Гэтэл залуу багш нарыг Сүрэнчимэг байнга дарамталж, доромжилдог юм байна.
-Сүрэнчимэг захирал ажлаа аваад удаагүй байгаа. Өмнөх захирал нь ямар шалтгаанаар ажлаасаа гарсан юм бол?
-Манай институтын захирал Сүглэгмаа гэж хүн бий. Тэр захирал маань жирэмсний амралтаа авсан байгаа. Түүний оронд Туяа гэдэг хүн захирлаар ажиллаж байсан ч, Сүрэнчимэг өнгөрөгч дөрөвдүгээр сараас захирлын түр орлон гүйцэтгэгчээр ажиллах болсон.
-Захирлын түр орлон гүйцэтгэгчид ажилчдаа халах эрх байдаг юм болов уу?
-Түр орлон гүйцэтгэгч бол эрхзүйн чадамжгүй хүн. Дээр нь Сүрэнчимэг захирал төрийн албаны шалгалтад ч ороогүй.
-Цаашид хэрхэх вэ?
-Би үүнийг мэргэшсэн, ур чадвартай ажилчдыг төлөвлөгөөтэй халж байна гэж харж байгаа. Цаана нь “60 тэрбум”-ынхан байгаа ч гэж бодож байна. Монголын боловсролын сургалт, аргазүйн голомт болсон цэгийг “60 тэрбум”-ынхан “самарч” байна. Тиймээс бид Сүрэнчимэгийг өөрийг нь ажлаас халагдах хүртэл, боловсролын салбараас гарах хүртэл нь эцсээ хүртэл тэмцэнэ.
Г.Сүрэн