Пентагон жил тутам БНХАУ-ын Батлан хамгаалахын талаарх “China Military Power Report” тайлангаа гаргаж, Конгресс руу илгээдэг уламжлалтай. Энэ талаар “www.dailymail.co.uk” сайт мэдээллээ.
“АНУ-д байршилд агаараас цохилт өгөх зорилгоор БНХАУ-ын эрх баригчид агаарын цэргийн үйл ажиллагаагаа тэлж байна” хэмээн Пентагоны тайланд дурьджээ.
БНХАУ-ын Ардыг Чөлөөлөх Арми /ХАЧА/-ийн бөмбөгдөгч онгоцууд улсынхаа эргээс улам холдон, алсын зайн нислэг үйлдэх нь нэмэгдсэн гэнэ. Армийнхан өнгөрсөн онд Японы тэнгис, Номхон Далайн баруун эрэг, Тайвань, Өмнөд Хятадын тэнгис дээгүүр 10 гаруй удаа нислэг үйлдсэн байна.
Уг тайланд “Гурван жилийн хугацаанд БНХАУ-ын армийн бөмбөгдөгч онгоцнуудыг үйл ажиллагаа явуулдаг талбарууд маш хурдацтай тэлж байна. Энэ нь АНУ болон холбоотнуудын байрлалд агаараас цохилт өгөх зорилготой туршилт байх магадлалтай. Тэд далайн тэнгисийн чухал гэх бүс нутгуудад нислэг үйлдэн, тааварлахын аргагүй туршлага хуримтлуулж байна” гэж бичжээ.
Тус улс 2013, 2014 онд дээрхтэй ижил туршилт хоёр хийж байсан бол 2015, 2016 онд дөрвөн удаа туршилт хийжээ. Харин ганцхан жилийн дараа буюу 2017 онд уг туршилтын тоо эрс нэмэгдсэн талаар уг тайланд онцолжээ. Жилээс жилд тус улсын армийн хүч улам хүчирхэгжиж буй нь “аюулын харанга дэлсэх” болсон талаар Пентагон, Конгресс руу илгээсэн тайландаа дурьджээ.
АНУ, БНХАУ-ын дунд дэгдсэн худалдааны маргаанаас болж хоёр улсын харилцаа ХУРЦДСАН. Вашингтон цаг тутам Бээжингийн үйдлийг хянадаг гэхэд болно.
БНХАУ-ын сөнөөгч онгоцууд ямар ч сануулга өгөхгүйгээр сүүлийн өдрүүдэд маргаантай Өмнөд Хятадын тэнгист эргүүл хийх нь ихэссэн явдалд Вашингтон дургүйцэн, “БНХАУ-ын өдөөн турхиралтыг дахин тэвчихгүй” гэж сануулжээ.
Өмнөд Хятад тэнгис дэх Спартли арлыг Хятадаас гадна Тайвань, Индонез, Малайз, Филиппин, Вьетнам улс өөрийн эзэмшлийнх хэмээн мэдэгдэж, Бээжинтэй байнга зөрчилдлөг. Бээжин өнгөрсөн 2010 оноос бусдын шаардлагыг үл тоон, тус бүсэд баазаа барьж, цэргээ байршуулах болсон.
Олон улсын шаардлагыг үл тоон маргаантай бүсэд зөвшөөрөлгүйгээр бүтээн байгуулалтын ажил хийж буй БНХАУ-ын үйлдлийг ХЯЗГААРЛАХ зорилгоор өнгөрөгч зургаадугаар сард АНУ-ын Батлан хамгаалахын сайд, генерал Жеймс Маттис Бээжинд айлчилсан юм.
Тэрбээр айлчлалынхаа үеэр БНХАУ-ын Ерөнхийлөгч Си Зиньпинтэй уулзаж, улсынхаа байр суурийг хүргэсэн билээ.
Сайд “Бээжин хүч чадлаараа айлган, маргаантай бүсэд эрхээ тогтоохыг АНУ зөвшөөрөхгүй. БНХАУ бусад улсын эрх ашгийн нэгдүгээрт тавьж, олон улсын шаардлагыг биелүүлэх учиртай” хэмээн мэдэгджээ.
Уг мэдэгдлийн хариуд Си дарга “Өвөг дээдсийнхээ үлдээсэн газар нутгаас бусдад ганц ямхыг ч өгч чадахгүй. Бид үргэлж энхтайвныг эрхэмлэдэг. Гэхдээ бид зүгээр суугаад газар нутгаа бусдад алдахыг зөвшөөрөхгүй. Энэ талаар дахин ямар ч улстай ярилцахгүй” гэв.
Б.Дэлгэрцэцэг
Уншиж байна |