Засгийн газрын ээлжит хуралдаан болж байна. Хуралдаанаар хэлэлцэн шийдвэрлэсэн асуудалтай холбогдуулан ХНХ-ын сайд С.Чинзориг мэдээлэл хийлээ. ХНХ-ын сайд С.Чинзориг:

-Засгийн газрын хуралдаанаар төрийн албан хаагчдын цалин ирэх есдүгээр сарын нэгнээс нэмэх шийдвэр гаргалаа. Төрийн албан хаагчдын цалинг нэмэхдээ инфляцийн түвшинг барьсан. Мөн эрүүл мэнд, боловсролын салбарт хийгдсэн төрийн албан хаагчдын ажлын байрны нөхцөлийн үнэлгээнд тулгуурласан. Хамгийн ачаалал өндөртэй, ур чадвар шаарддаг, ажлын байрны нөхцөл хүнд төрийн албан хаагчдын зэрэглэлийг харгалзсан. Мөн соёл урлагийн албан хаагчдын цалинг нэмэгдүүлэхээр тооцсон. Төрийн албан хаагчдын цалинг нэмэгдүүлэхдээ улс төрийн болон шүүгч, прокурорын цалинг нэмэхгүй.  Ингэхдээ багш, эмч нартай дүйцэхүйц албан тушаалтан, түүнээс доогуур цалинтай байгаа төрийн албан хаагчдын цалинг 8 хувиар нэмнэ.

Мөн багш, цэцэрлэгийн багш, сувилагч нарын ажлын нөхцөл байдалтай холбогдуулан албан тушаалын зэрэглэлээс хамаарч 12-30 хувиар цалинг нэмнэ.  Төрийн албан хаагчдын цалинг нэмж байгаатай холбоотой УИХ-ын тогтоолд өөрчлөлт оруулна. Төрийн албан хаагчдын 90 хувь буюу 170 мянган төрийн албан хаагчдын цалинг нэмж байна гэлээ. Тэрбээр мэдээлэл хийснийхээ дараа сэтгүүлчдийн сонирхсон асуултад хариулав. 

-Цалин нэмэгдүүлэх эх үүсвэрийг хаанаас гаргах вэ? Нийт хичнээн төгрөг шаардлагатай бол?

-2018 оны улсын төсөвт төрийн албан хаагчдад нэг урамшуулал олгох 56.4 тэрбум төгрөг тусгасан. Энэ хөрөнгийн эх үүсвэрт багтаад төрийн албан хаагчдын цалин хөлсийг нэмэгдүүлж, ангилал зэрэглэлийг нэмэгдүүлж байна. Өнгөрсөн жил бид нэг удаагийн 54 тэрбум төгрөг тусгаад олгосон нь шүүмжлэл дагуулсан. Төрийн албан хаагчдын цалинг нэмэгдүүлэх асуудлаар МҮЭ-ийн байгууллагатай хэлэлцээр уулзалт хийсэн. Төрийн албан хаагчдын цалин 50 хувиар нэмэгдүүлэх санал тавьсан. Засгийн газарт энэ хөрөнгө байхгүй. 

-Энэ оны төсөвт тодотгол хийх үү?

-Төсвийн тухай хуулиар 2018 оны төсөвт тодотгол хийх үндэслэл гарахгүй байна гэж үзсэн.

Н.Энх