АНУ-ын Үндэсний аюулгүй байдлын зөвлөх Жон Болтон ОХУ-ын эрх баригчдад хандан нэгэн ХАТУУХАН мэдэгдэл хийсэн талаар “www.theguardian.com” сайт мэдээллээ.
Тэрбээр “ОХУ, АНУ-ын завсрын сонгуульд хөндлөнгөөс оролцохгүй байхыг анхааруулж байна. Шаардлагатай гэвэл бид хариу арга хэмжээ авах болно. Энэ бол Трампын Засаг захиргааны эхний ба эцсийн сануулга” гэж хэлжээ.
Тэрбээр Женев хотноо ОХУ-ын Аюулгүйн зөвлөлийн нарийн бичгийн дарга Николай Патрушевтэй уулзах үеэрээ ийнхүү мэдэгдэв. Уг мэдэгдлийн хариуд Николай Патрушев “ОХУ-ын байр суурь Ерөнхийлөгч В.Путины байр суурьтай ижил” гэж хэлжээ.
Хамтарсан хэвлэлийн хурлын үеэр Болтон “Хоёр улс иргэний дайн дэгдэж, дотоодын зөрчил мөргөлдөөнтэй байгаа Сирийн хямралыг зогсооход АНУ, ОХУ хамтран ажиллахаар тохиролсон” хэмээв.
Финландын Хельсинк хотноо өнгөрөгч сард ПУТИН-ТРАМП нарын 2018 оны анхны дээд хэмжээний уулзалт зохион байгуулагдсан юм. Уг уулзалтын үеэр Ерөнхийлөгч Путин “АНУ-ын Ерөнхийлөгчийн сонгуулийн дүнд ОХУ хөндлөнгөөс нөлөөлөөгүй. Энэ бол ОХУ-ын эцсийн байр суурь” гэж мэдэгджээ.
Трамп ч мөн үеэр Путинтай санал нэгдэж буйгаа илэрхийлсэн ч 24 цагийн дараа байр сууриа өөрчилсөн нь олныг дургүйцүүлсэн юм.
Б.Дэлгэрцэцэг
Уншиж байна |