Вьетнамын Дээд шүүх АНУ-ын хоёр иргэнийг төрийн эргэлт хийхийг санаархсан хэмээн буруутган, 14 жилийн ял оноосон талаар “www.dailymail.co.uk” сайт мэдээллээ.

Шүүгч “Тэдний үйлдсэн хэрэг тун НОЦТОЙ. Тэд үндэсний аюулгүй байдалд заналхийлсэн. Тогтвортой байдалд аюул учруулсан. Төрийн ашиг сонирхолд сөргөөр нөлөөлсөн” гэж хэлжээ.

АНУ-ын иргэн Жеймс Нгуэн, Англе Пан нар Вьетнамын Засгийн газрын эсрэг эсэргүүцлийн жагсаал зохион байгуулах, олон нийтийн сүлжээ, радио болон телевизийг ашиглан иргэдийг эрх баригчдынх нь эсрэг өдөөн турхирахаар төлөвлөж байсан гэв.

Тэд Америкт байх хугацаандаа Вьетнам дахь холбоотнуудтайгаа холбоо тогтоон, заавар зөвлөгөө өгдөг байжээ.

Хоёр долоо хоногт үргэлжилсэн шүүхийн үеэр тэднээс гадна 10 иргэнд ял оноосон байна. “Ялын хугацаа дууссан өдөр америкчуудыг Вьетнамаас албадан гаргана” хэмээн албаныхан уламжлав.

Вьетнам дахь АНУ-ын Элчин сайдын яам “Ял сонсоод буй иргэдэд хуулийн зөвлөгөө өгч, шаардлагатай арга хэмжээ авч байгаа” гэж мэдэгджээ.

Б.Дэлгэрцэцэг