Гадаад харилцааны сайд Д.Цогтбаатар 2018 оны 8 дугаар сарын 31-ний өдөр манай улсад айлчилж байгаа Арабын Нэгдсэн Эмират Улсын Гадаад хэрэг, олон улсын хамтын ажиллагааны яамны Олон улсын хамтын ажиллагаа хариуцсан Төрийн сайд хатагтай Рийм Бинт Ибрахим Аль-Хашимиг хүлээн авч уулзав.

Сайд нар хоёр орны харилцаа, хамтын ажиллагаа идэвхтэй хөгжиж байгаад сэтгэл хангалуун байгаагаа илэрхийлж, хоёр талын болон олон улсын харилцааны харилцан сонирхсон асуудлаар санал солилцов

.

Сайд Д.Цогтбаатар Монгол Улс Булангийн орнууд, түүний дотор Эмираттай явуулж буй харилцаанд ач холбогдол өгч ажиллаж байгааг тэмдэглэж, эмиратын талын хөнгөлөлттэй зээлийн тусламжтайгаар байгуулагдсан Тайширын усан цахилгаан станц шиг томоохон төслүүдийг цаашид хэрэгжүүлэх боломж байгааг онцолж, хамтарч ажиллах сонирхолтой байгаагаа илэрхийлэв.

Эмиратын Төрийн сайд Монгол Улсад анх удаагаа зочлон ирж байна гээд найрсаг дотно хүлээн авч байгаад талархал илэрхийлж, хоёр талын хамтын ажиллагааг боловсрол, хөдөө аж ахуй, эрүүл мэндийн салбарт өргөжүүлэн хөгжүүлэхийн төлөө буйгаа мэдэгдэв.

Төрийн сайдыг дагалдан ирсэн албан ёсны төлөөлөгчид 2018 оны 8 дугаар сарын 30-ны өдөр Боловсрол, соёл, шинжлэх ухаан, Эрүүл мэнд, Хүнс, хөдөө аж ахуй, хөнгөн үйлдвэрийн яамд болон Хөгжлийн банкны төлөөлөгчидтэй уулзалт хийж, хоёр талын хамтын ажиллагаа, хэрэгжиж буй төсөл хөтөлбөрийн талаар дэлгэрэнгүй санал солилцохоос гадна 14-р сургууль, Улсын клиникийн нэгдүгээр эмнэлгийн үйл ажиллагаатай танилцсан юм.

Хатагтай Рийм Бинт Ибрахим Аль-Хашими нь 2020 онд Дубай хотноо зохион байгуулагдах ЭКСПО-2020 олон улсын үзэсгэлэнгийн зохион байгуулах үндэсний хорооны Ерөнхий захирлын албыг хашдаг бөгөөд монголын тал уг арга хэмжээнд Ерөнхий сайдын түвшинд оролцохоо нотолсонд талархал илэрхийлж, хамтран ажиллахад бэлэн байгаагаа нотлов.

Айлчлалын хүрээнд Төрийн сайд Рийм бинт Ибрахим Аль-Хашими Монгол Улсын Ерөнхийлөгч Х.Баттулгад бараалхаж, Ерөнхий сайдын Гадаад бодлогын Зөвлөх Б.Мөнхжинтэй уулзалт хийв.

Эх сурвалж: ГХЯ