“Восток 2018” цэргийн хамтарсан сургуулилт амжилттай үргэлжилж байна. ОХУ-ын Ерөнхийлөгч В.Путин өчигдөр цэргийн сургуулилт болж буй бүс нутагт зочилж, нөхцөл байдалтай биечлэн танилцжээ. Энэ талаар “TASS” агентлаг болон “www.theguardian.com” сайт мэдээллээ.
Хүйтэн дайнаас хойших хамгийн том цэргийн сургуулилтыг ОХУ зохион байгуулж, олон улсын анхаарлыг татаж буй юм.
ОХУ, БНХАУ, Монгол Улсын хамтарсан цэргийн сургуулилт өдгөө Зүүн Сибирьт амжилттай үргэлжилж байна.
“Восток 2018” хамтарсан цэргийн сургуулилт энэ сарын 11-17 хооронд үргэлжилнэ. Москва уг цэргийн сургуулилтад 297 мянган цэрэг, 36 мянган техник төхөөрөмжөө оролцуулж буй бол Бээжин шилдэг гэсэн 3200 цэргийн албан хаагчаа Орос руу илгээсэн юм. Хоёр их гүрний дунд орших, далайд гарцгүй Монгол Улс уг цэргийн сургуулилтад хэдэн цэрэг оролцуулж байгаа нь НУУЦ байна.
Хуучин ЗХУ хамгийн сүүлд хүйтэн дайны үе буюу 1981 онд томоохон хэмжээний цэргийн сургуулилтыг зохион байгуулсан түүхтэй. Энэхүү сургуулилтын гол зорилго ОХУ-ын Батлан хамгаалах салбар “ган мэт бат бөх” гэдгийг харуулсан үйл явдал байжээ.
Энэ хугацаанд Москва дээрхтэй төстэй томоохон хэмжээний цэргийн сургуулилт зохион байгуулаагүй өнөөг хүрчээ.
2014 онд ОХУ-ын эрх баригчид Украины зүүн хязгаарын Крымийн хойгийг өөртөө нэгтгэснээс хойш дайсагнасан харилцаатай байгаа “НАТО”-ийн шаардлагыг үл тоон цэргийн сургуулилтаа үргэлжлүүлж байна.
“НАТО”-ын эрх баригчид “Восток 2018” хамтарсан цэргийн сургуулилтыг “Өдөөн турхирсан үйл явдал” хэмээгээд буй юм. Мөн Москва ямар нэгэн байдлаар “НАТО”-ийн гишүүн орны хилийг зөрчсөн, хүчээрээ айлган сүрдүүлсэн үйлдэл гаргавал сануулга өгөхгүйгээр ГАЛ нээхээ мэдэгджээ.
ОХУ-ын Владивосток хотноо зохион байгуулагдсан Дорнын Эдийн засгийн чуулганыг амжилттай дуусгаж, эх орондоо ашигтай олон гэрээг амжилттай үзэглэсэн Кремлийн тэргүүн В.Путин болон ОХУ-ын Батлан хамгаалахын сайд Сергей Шойгу нарын хамтаар өчигдөр “Восток 2018” цэргийн сургуулилт дээр очиж, нөхцөл байдалтай биечлэн танилцжээ.
Ерөнхийлөгч Путин “Хамтарсан цэргийн сургуулилт цэргийн эр зориг, хатуужлыг улам хурцалдаг. Эрхэм нөхдөд баяр хүргэе” хэмээв.
Тэрбээр үргэлжлүүлэн “ОХУ 1981 оноос хойш анх удаагаа ийм том хэмжээний цэргийн сургуулилт зохион байгуулж байна. Бид ОХУ-ын Батлан хамгаалахын сүр хүчийг сүүлийн үеийн дэвшилтэд технологиор хангаж, олон улсад цэргийн хамтарсан холбоо байгуулахаар хамтарсан сургуулилт зохион байгууллаа. ОХУ олон улсад энхтайван тогтоохын тулд ямар ч улстай НӨХӨРЛӨЖ чадна. Харин ашгийн төлөө олон улсад зөрчилдөөн үүсгэхийг ямар ч улсад хүлээн зөвшөөрөхгүй. Бид энэ бүхнийг хараад суухгүй, тэвчихгүй” гэж мэдэгджээ.
ОХУ, Сири дэх цэргийн ажиллагаа үргэлжилсээр байгаа. Оросын тусгай хүчин террористуудын үүр болоод буй Сирийн Идлиб мужид шат дараатай цэргийн ажиллагаа явуулсаар байна.
Идлиб хотыг террористуудаас чөлөөлөх цэргийн ажиллагаа хоёр сарын хугацаанд үргэлжлэх ба ОХУ, Сири болон Ираны цэргүүдийн хамтаар үүрэг гүйцэтгэж буй юм.
Гэхдээ уг цэргийн ажиллагаа эхлээд арван өдрийн дотор 30 мянган иргэн ОРОН ГЭРГҮЙ болсон гэх тайланг НҮБ гаргажээ. Уг асуудлаар Ерөнхийлөгч Путин “Бидний алхам тутмыг шүүмжлэх эрх байхгүй. Бид Сирийн Засгийн газрын зөвшөөрлөөр, зөвхөн террористуудын байршилд цохилт өгч байна” гэж мэдэгджээ.
Б.Дэлгэрцэцэг
Уншиж байна |