Нийслэлийн МАН-ын бага хурал Хүүхдийн ордонд ширүүхэн уур амьсгалтай эхэллээ. Нийслэлийн МАН-ын бага хуралд 369 төлөөлөгч оролцож байна. Үүнд дүүрэг тус бүрээс 45 төлөөлөл, мөн нийслэлээс сонгогдсон УИХ-ын гишүүд оролцож байгаа юм.
Нийслэлийн МАН-ын хорооны даргын томилгоо өнөөдөр улс төрийн хүрээнийхний анхаарлыг татаж байна. НИТХ-ын экс дарга Ц.Сандуй ажлаа нийслэлийн МАН-ын хорооны хорооны даргаа хүлээлгэж өгснөөс хойш жил гаруйн хугацаа өнгөрөөд байгаа. Энэ хугацаанд нийслэлийн МАН-ын даргын үүргийг нийслэлийн Засаг дарга бөгөөд Улаанбаатар хотын захирагч С.Батболд гүйцэтгэсээр ирсэн.
Нийслэлийн МАН-ын хорооны даргаа бага хурлаараа сонгодог журамтай. Энэ дагуу өнөөдөр нийслэлийн МАН-ын бага хурал хуралдаж даргаа сонгоно. Өнгөрсөн хугацаанд хэдэнтээ товлогдоод хойшлогдож байлаа.
Нийслэлийн МАН-ын даргад нийслэлийн Засаг дарга бөгөөд Улаанбаатар хотын захирагч С.Батболд, УУХҮ-ийн сайд Д.Сумъяабазар, нийслэлийн Засаг дарга асан Ц.Батбаяр нарыг нэр дэвшин өрсөлдөнө гэсэн таамаглал байсан. Дүрмийн дагуу МАН-ын Удирдах зөвлөл хуралдаж, нийслэлийн МАН-ын даргад нэр дэвшүүлэх эрхмийг санал болгодог. Тиймээс ч өчигдөр МАН-ын Удирдах зөвлөл хуралдаж, нийслэлийн МАН-ын даргад нэрд дэвшүүлэх асуудлыг хэлэлцсэн. Удирдах зөвлөлийн хуралдааны үеэр УИХ-ын экс гишүүн Ц.Батбаяр нэрээ татаж, нийслэлийн намын хорооны даргад өрсөлдөхгүй гэдгээ мэдэгдсэн байна. Удирдах зөвлөлийн хуралдаанд оролцсон гишүүдийн нууц санал хураалтаар нийслэлийн МАН-ын даргад С.Батболдын нэрийг дэвшүүлэхээр олонхи дэмжсэн байна. Тиймээс нийслэлийн МАН-ын хорооны бага хурлаар Удирдах зөвлөлөөс нийслэлийн Засаг дарга С.Батболдын нэрийг оруулахаар боллоо.
Харин бага хурлын үеэр нийслэлийн МАН-ын даргад заалнаас хэн нэгний нэрийг дэвшүүлэн өрсөлдүүлэх нь нээлттэй. Энэ удаа сонгогдох нийслэлийн МАН-ын даргын нуруун дээр ихээхэн үүрэг хариуцлага, ачаа ирнэ гэж ойлгож болно. Эрх баригч хүчний бүрэн эрхийн хугацаа талдаа орсон энэ үед намын хөтөлбөрийг хэрэгжүүлэхээс гадна 2020 оны сонгуульд нийслэлийг удирдах орох үүрэг шинэ даргад ногдоно.
Аль ч улс төрийн хүчний хувьд нийслэлийн нам хороо нь чухал үүрэгтэй байдаг. Сонгуулиар нийслэлийн сонгогчдын саналыг хэрхэн авснаас тухайн намын ялалт, ялагдал хамаардаг. Тиймээс ч нийслэлийн МАН-ын бага хуралд Ерөнхий сайд У.Хүрэлүх амжилт хүсч, ирүүлсэн мэндчилгээндээ “Нийслэлийн Засаг даргын мөрийн хөтөлбөр Засгийн газрын хөтөлбөртэй эн тэнцүү чухал нөлөөлтэй. 2016 онд сонгогчид МАН-д итгэл өгч сонгосон. Тиймээс нийслэлийн Засаг даргын мөрийн хөтөлбөрийг хэрэгжүүлж, “нэгдмэл хүч, нийслэлийн хүч” уриагаар 2020 оны сонгуульд оролцох ёстой. Нийслэлийн МАН-д ялагдах эрх байхгүй” гэдгийг онцолсон байлаа.
Тиймээс өнөөдөр сонгогдох нийслэлийн МАН-ын шинэ дарга ирэх хоёр жилд, ирэх УИХ-ын сонгуулиар намдаа "нийслэлийн хүч"-ийг харуулах нэн хариуцлагатай үүрэг хүлээх юм.
Н.Энхлэн