Өмнөд Хятадын тэнгист АНУ болон БНХАУ-ын байлдааны хөлөг онгоцууд мөргөлдөх шахсан талаар “www.thedrive.com” сайт мэдээллээ.
Хятадын байлдааны хөлөг онгоц АНУ-ын хөлөг рүү хэтэрхий ойртож, улмаар шахсан байна. АНУ-ын хөлөг онгоц байршлаа өөрчлөөгүй бол хоёр хөлөг мөргөлдөх дөхсөн талаар Пентагон мэдээлэв.
АНУ-ын "USS Decatu" пуужин харвагч хөлөг өнгөрсөн 30-ны өдөр 11.00 цагийн орчимд БНХАУ-ын газар нутгийн нэгээхэн хэсэг гэгддэг Спартли арал орчимд сургуулилт хийжээ.
Уг үйл явдлын дараа БНХАУ-ын Батлан хамгаалах яам америкчуудад анхааруулга өгөх зорилгоор "Луян" байлдааны хөлгийг илгээсэн гэнэ.
Спартли цуврал арлыг Бээжингээс гадна Азийн зургаан улс ӨӨРИЙНХ гэдэг. Гэхдээ Бээжин эдгээр аралд хүч түрэмгийлэн цэргийн бааз барих, цэргээ илгээх зэрэг хууль бус үйлдэл гаргадаг нь Вашингтоныг байнга дургүйцүүлдэг билээ.
Пентагоны тэргүүн Жеймс Маттис өнгөрсөн долоодугаар сард БНХАУ-ын Си Зиньпинтэй Бээжин хотноо уулзах үеэдээ “Хятад газар нутгийн маргаантай бүсэд хүч түрэмгийлэх бодлого явуулахыг АНУ хараад сууж тэвчихгүй” гэж мэдэгдсэн юм.
Энэ сарын сүүлээр АНУ, БНХАУ-ын Батлан хамгаалах яамны удирдлагууд Бээжин хотноо чуулж, цаг үеийн асуудлаар хэлэлцэхээр төлөвлөсөн билээ. Гэхдээ дээрх үйл явдлын дараа АНУ уг уулзалтад оролцохгүй гэдгээ илэрхийлсэн бол Бээжин мөн ижилхэн байр суурьтай буйгаа илэрхийлжээ.
Б.Дэлгэрцэцэг
Уншиж байна |