Аюулгүй байдал, гадаадын бодлогын байнгын хороо хуралдлаа. Хуралдаанаар Дэлхийн худалдааны байгууллагын “Иргэний агаарын хөлгийн худалдааны хэлэлцээр”-т Монгол Улс нэгдэн орох тухай хуулийн төслийг хэлэлцсэн юм. Хэлэлцэж байгаа асуудалтай холбогдуулан гишүүд асуулт тавьж, хариулт авлаа. Монгол Улсад агаарын тээврийг хөгжүүлэх хүчин зүйл нь иргэний агаарын тээврийн сэлбэг, хэрэгслийг татвараас чөлөөлөх зохицуулалт байдаг байна. Манай улсад өнөөдрийн байдлаар 34 агаарын хөлөг үйлчилж байгаа аж. Өнөөдрийн тухайд зорчигч тээврээс бусад агаарын хөлөг худалдан авахад татварын дарамт байгаа аж. Тиймээс Дэлхийн худалдааны байгууллагын Иргэнй агаарын хөлгийн худалдааны хэлэлцээрт нэгдэн орох нь зүйтэй гэж үзжээ. Уг хэлэлцээр нэгдэн орсноор агаарын хөлөг, бусад тоног төхөөрөмжийг худалдан авах, засвар үйлчилгээ хийхэд таатай нөхцөл бүрдэнэ гэж үзжээ. Хэлэлцэж байгаа асуудалтай холбогдуулан гишүүд асуултад ЗТХ-ийн сайд Я.Содбаатар хариуллаа.
УИХ-ын гишүүн Б.Энх-Амгалан:
-Энэ хэлэлцээрт нэгдсэнээр ямар ач холбогдолтой вэ? МИАТ ямар үр дүнтэй ажиллах вэ?
-Энэ хуулийн төсөл өмнө нь байнгын хороогоор орсон. Манай улс энэ хэлэлцээрт орсноор давуу нөхцөл байдал үүснэ гэж үзэж байна. Зоригч тээврээс гадна иргэний агаарын тээврийн асуудал үүсдэг. Сүүлийн үед засвар үйлчилгээний үйлдэг болсон. Энэ тал дээр давуу байдал үүсч байгаа юм.
УИХ-ын гишүүн Б.Бат-Эрдэнэ:
-Олон улсын зорчигч тээвэрлэлт болон орон нутгийн зорчигч тээвэрлэлт сүүлийн жилүүдэд өсчээ. Орон нутгийн зорчигч тээвэрлэлтийн өрсөлдөөн ямар байна вэ? Хэнтий аймгийг түүхэн аялал жуучлалын төв болгосон. Гэтэл Дадлын онгоцны буудал хүнд нөхцөл байдалтай байгаа.
ИНЕГ-ын дарга н.Бямбасүрэн:
-Орон нутгийн нислэгийн үнийг бууруулахын тулд хэд хэдэн арга хэмжээ авч ажиллаж байна. Нийгмийн зорилтот бүлэг чиглэсэн хүмүүст татаас өгч байгаа. Нислэг зогссон байсан Говь-Алтай, Мөрөнгийн чиглэлд нислэг хийж байгаа. Одоо байгаагаас хямд өртөгтэй. Улаанбаатараас бид шатахууныг авиа компаниудад хүргэхэд үнэ нь нэмэгдэж байгаа. Улаанбаатарт хааш хаашаа 300 км-т нислэг ашиггүй болж байна.
УИХ-ын гишүүн Б.Энх-Амгалан:
-ИНЕГ-ын дарга н.Бямбасүрэн шинэ нисэхийг энэ оны 11 дүгээр сард ашиглалт оруулахгүй бол толгойгоороо хариуцна гээд байсан. Гэтэл энэ онд ашиглалтад оруулсангүй, хариуцлагаа хүлээгээрэй. Үндэсний агаарын тээвэрлэгчээд дэмжих бодлого яваад байна уу, гадныханд найр тавиад байна уу. Үүн дээрээ онцгой анхаарай. Танай алдагдлыг нэмж байгаа гадаадад өндөр цалинтай сууж байгаа олон төлөөлөгч нар, төсөв орон тоог хэтрүүлж байгаа асуудал МИАТ-ийг ашигтай ажиллуулахгүй байгаа.
Ийнхүү байнгын хорооны гишүүд асуулт тавьж, хариулт авсны дараа дээрх төслийг хэлэлцэхийг дэмжлээ.
Н.Энх