УИХ-ын гишүүн Н.Номтойбаяр, Н.Амарзаяа, Д.Ганболд, Ж.Бат-Эрдэнэ, Д.Оюунхорол, А.Ундраа, О.Содбилэг нар нэгдэн, ЖДҮХС-тай холбоотой асуудлыг шалгах УИХ-ын түр хороог байгуулах тогтоолын төслийг өнөөдөр УИХ-ын даргад өргөн барилаа.
Ерөнхий сайдаас эхлээд сайд нар, УИХ-ын гишүүд нэр холбогдсон ЖДҮХС-гийн зээлийн асуудлыг Сангийн яам шалгаж байгааг ашиг сонирхлын зөрчил хэмээн үзэж буйгаа УИХ-ын гишүүн Н.Номтойбаяр илэрхийллээ. Тэрбээр цааш нь “ Хулгайч хулгайчаа шалгахгүй. Тиймээс энэ хулгайч нарыг шалгах түр хороог байгуулж байна” хэмээн ярилаа.
Энэ түр хороонд ЖДҮХС-гаас зээл аваагүй, нэр холбогдоогүй гишүүд багтсан гэдгийг тэд хэлж байна. Мөн энэ түр хороонд АН-аас хамтран ажиллахаа илэрхийлсэн байна. Одоогоор УИХ-ын гишүүн Б.Пүрэвдоржид түр хороонд орж, хамтран ажиллах санал хүргүүлээд буй аж.
Б.Учрал