ОХУ-ын Ерөнхийлөгч В.Путин өчигдөр нийслэл Москва хотноо зохион байгуулагдсан бизнесийн чуулга уулзалтад оролцох үеэрээ Керчийн хоолойд болсон үйл явдалтай холбогдуулан анх удаагаа өөрийн байр сууриа хүргэсэн талаар "TASS" агентлаг мэдээллээ.
Тэрбээр "Украины хөлгүүд эхэлж манай улсын хилийг зөрчсөн. Тэд өөрсдийн буруугаа зөвтгөж байгаа нь ичгүүртэй. Киевийн эрх баригчид ямар ч хамаагүй аргаар ОХУ-ын нэр хүндэд халдах, гутаан доромжлохыг санаархаж буй. Энэ ажиллагаа нь тун амжилтай хэрэгжиж байгаа гэхэд болно. Тэд өнөөдөр ОХУ-ын эсрэг үзлийн тусламжтай мөнгө олж байна" гэж хэлжээ.
Украины тэнгисийн хөлгүүдийн талаар "Энэ бол зохион байгуулалттай үйл ажиллагаа. Украины Ерөнхийлөгч Петр Порошенко нэр хүндээ өсгөхийн тулд ийнхүү заль мэх зохиосон" гэж Путин мэдэгдэв.
Ирэх гуравдугаар сард Украинд Ерөнхийлөгчийн сонгууль зохион байгуулагдана. Бизнесийн салбараас улс төрд орж ирсэн Порошенкогийн нэр хүнд огцом унасан ба тэрбээр нэр дэвшигчдээс нэр хүндээрээ адагт яваа аж.
Украины тэнгисийн флотын гурван хөлөг Азовын тэнгисийг гатлан Мариуполь боомтод хүрэхээр явж байхдаа ОХУ-ын хилийг зөрчсөн аж. Уг үйл явдалтай холбогдуулан ОХУ-ын талаас хил зөрчсөн хөлгүүдийг олзолж, багийн 23 гишүүнийг нь баривчилсан гэнэ.
Крымийн шүүхээс багийн гишүүдэд хорих ял оноохоор төлөвлөж буйгаа өчигдөр зарласан юм.
Б.Дэлгэрцэцэг