УИХ-ын гишүүн Ж.Батзандан цаг үеийн асуудлаар мэдээлэл хийлээ. Тэрбээр:
-Өнөөдөр УИХ-ын чуулганы хуралдаанаар Засгийн газрыг огцруулах асуудлыг хэлэлцэхээр байсан. Харамсалтай нь УИХ-ын дарга М.Энхболд Засгийн газраас огцруулж чадахгүй болсон учир хуралдаанаа хаяад зугатаж алга болсон гэж ойлгож байгаа. Ёсзүйн дэд хороог хуралдуулах санал гаргасан. Өнгөрсөн жил "60 тэрбум"-ын асуудлаар Ёсзүйн дэд хороог хуралдуулах санал гаргасан ч боловч хуралдуулаагүй. УИХ-ын даргын эзгүйд УИХ-ын дэд дарга хуралдуулж болдог. УИХ-ын даргыг эрэн сурвалжилж байна.
Төрийн хямралаас монголчууд амжилттай гарч чадна. Манай намын зарим хүмүүс М.Энхболдыг хамгаална гэж байгаа сурагтай. Тэр хүмүүстэй ч гэсэн хатуу тэмцэл хийх болно хэмээгээд сэтгүүлчдийн асуултад хариуллаа.
-Танай намын хэн хэн М.Энхболд даргыг хамгаалж байна вэ?
-Манай намын бүлгийн дарга М.Энхболдтой нэгдээд байгаа. "Эрдэнэт"-ийг тойрсон бүлэглэл нэгдэж, Засгийн газар руу дайрч байна. Засгийн газартай хариуцлага тооцохыг буруу гэж бодохгүй байна. Гэхдээ Засгийн газар руу бүлэглэл дайрч байгаа нь буруу.
-Та УИХ-ын даргыг ажлаа хаяж гарсан гэж үзэж байна уу?
-УИХ-ын чуулган дээр С.Бямбацогт гишүүн Ёсзүйн байнгын хороог хуралдуулах санал гаргасан. Энэ саналыг гишүүдийн санал хураалтаар шийдэх ёстой. Гэтэл гишүүдийн санал хураалт явуулалгүй алх цохисон.
-Та УИХ-ын даргыг ажлаа өг гэж байна уу?
-Ажлаа хурдан өгөх хэрэгтэй.
Н.Нягт