МАН-ын Хяналтын ерөнхий хороо өчигдөр хуралдаж, УИХ-ын зургаан гишүүнийг намаас хөөх шийдвэр гаргажээ. УИХ-ын дарга М.Энхболд, гишүүн Д.Оюунхорол, Ж.Мөнхбат, Н.Номтойбаяр, Д.Хаянхярваа, Ц.Цогзолмаа нарыг намаас хөөх шийдвэр гаргасан ч шийдвэрээ буцаасан. Ямар асуудал үүссэн талаар Хяналтын ерөнхий хорооны гишүүн Х.Болдмандалаас тодрууллаа. Тэрбээр гишүүдийг намаас хасах асуудалд эсрэг байр суурь илэрхийлжээ.

-УИХ-ын гишүүдийг намаас хасах тухай яригдсан хурлын талаар мэдээлэл өгөөч.

-МАН нэн шинэ үеийнхээ түүхэнд УИХ-ын гишүүдийг хоморголон намаас хөөх асуудлыг хөндөж тавьж байгаагүй. Байж болох уу гэвэл болно. Намын дүрмийг ноцтой зөрчсөн, намын хамт олны эрх ашгийг хөсөрдүүлсэн бол намаас гарсанд тооцох тухай асуудлыг Хяналтын ерөнхий хороо ярьж болно. Гэхдээ манай намын дүрмэнд Хяналтын ерөнхий хороо асуудлыг санаачилж, шууд намаас гаргах заалт байхгүй. Тухайн гишүүнийг бүртгэсэн намын байгууллагын эрх мэдлийн асуудал.

Эв эеийг сахиулах үндсэн үүрэгтэй Хяналтын ерөнхий хороо маань улс төрийн бужигнаантай, нам дотроо үл ойлголцож, хоёр хуваагдсан  үед гал дээр тос нэмсэн мэт нэг талын гэх гишүүдийг шүүрч авч, хоморгон намаас хөөх тухай ярьж байгаа нь мэдрэмжгүй, хариуцлагагүй үйлдэл. Үүнийг би эсэргүүцсэн.

-Орой ийм шийдвэр гараагүй гэсэн мэдээллийг өгсөн?

-Би орой харьж, мэдээ нөхөж үзсэн. Нэлээн сандрангуй байдалтай, ийм асуудал болоогүй гэж ордоноос мэдэгдэл хийж байна лээ. Нэгэнт хийсэн үйлдэл, хэлсэн үгээ хоёр, гурван цагийн дараа буцааж залгиж байгаа нь улстөрчийн хувьд зохисгүй харагдаж байна.

-Яагаад тогтоолоо буцаасан юм бол?

-Бодвол уур амьсгалыг анзаарсан байлгүй. Заавар чиглэл өгдөг газар байдаг бол энэ болохгүй гэдгийг нь хэлсэн байлгүй гэж би тааж байна. Цөөнх болсон гишүүдийн байр сууринаас болж буцаагүй нь тодорхой.

Б.Учрал