БСШУС-ын сайд Ц.Цогзолмаа ажлаа өгч буйгаа мэдэгдлээ. Тэрбээр Засгийн газрыг огцруулах УИХ-ын 27 гишүүний нэг болсон. Гарын үсгээ баталгаажуулж, Ерөнхий сайдыг огцруулах кноп дарсан юм. Тиймээс шийдвэрээ үргэлжлүүлэн У.Хүрэлсүхийн Засгийн газарт ажиллахгүйгээ өнөөдөр мэдэгдлээ.
-Та танхимынхаа тэргүүнийг огцруулах гарын үсэг зурж, кноп дарсан. Яагаад ийм шийдвэр гаргав?
-Улс төр ёсзүйтэй байхыг шаарддаг. Хэн нэгэн хүний дохио зангаагаар асуудалд хандсан гэхээсээ илүү улстөрчийнхөө хувьд ёсзүй дээр суурилсан шийдвэр гаргасан. Шийдвэрээсээ буцах, булзах шаардлага надад байхгүй. Тиймээс би өөрийнхөө гарын үсгийг баталгаажуулж, кнопоо дарсан. Энэ бол миний улстөрчийн шийдвэр.
-Та ажлаа өгөх үү?
-Ерөнхий сайдыг шийдвэрээ гаргаж, ажлаа авахад ёсзүйн хувьд ямар ч асуудал байхгүй гэдгээ сая орж уулзаад хэллээ. Ажлаа өгнө гэсэн үг. Би бүтэн жилийн хугацаанд энэ салбарын шинэчлэлийн төлөө нойр, хоолгүй ажилласан. Гаргасан шийдвэр, хийсэн ажлын үр дүн цаг хугацааны дараа гарна. Ажлын үр дүндээ сэтгэл хангалуун байгаа.
-Нөхөр, хүүхдийнхээ ажил, албан тушаалд та ямар тайлбар өгөх вэ?
-Миний бага хүү Монгол Улсад ховор мэргэжилтэй. Далайн мэргэжлээр төгссөн гуравхан хүүхдийн нэг нь миний хүү. Мэргэжил эзэмшсэн нь буруу юу. Манай Засгийн газрын үед ажилд ороогүй. Ардчилсан засгийн үед мэргэжлээрээ төгсч ирээд, ажилласан. Тэр бүү хэл, Сингапурт төлөөлөгчийн газарт нь ажиллаад ирсэн. Ээж нь сайд болчихоор энэ хүүхэд буруутай болж болохгүй. Миний охин ХУИС-ийн аялал жуулчлалын анги төгсөөд, Англи мастер хийгээд намайг гишүүн, сайд болохоос өмнө мэргэжилтнээс нь эхлээд ахлах мэргэжилтэн бүх шатанд нь ажилласан. Би хүүхдүүдийнхээ ирээдүйн төлөө зайгаа тавьж өгөх ёстой. Миний нөхрийг эрчим хүчний салбарынхан бүгдээрээ мэднэ. Миний нөхөр болохоороо тэр хүн мэргэжлээрээ ажиллах ёсгүй юу. Эрчим хүчний салбарт хүлээн зөвшөөрөгдсөн инженерүүдийн нэг. Ажлын шаардлага хангаж байгаа бол гэр бүлийнхэн маань ажлаа хийгээд явах ёстой.
Б.Учрал