УИХ дахь АН-ын бүлгээс гурван гишүүндээ хариуцлага тооцсон билээ. Засгийн газрыг хамгаалсан УИХ-ын гишүүн Ж.Батзанданг АН-ын гишүүнчлэлээс хасч, Л.Болд, Д.Мурат нарын нэр дэвших эрхийг хассан. Харин энэ шийтгэлийг УИХ-ын гишүүн Л.Болд доромжлол хэмээн хүлээн авч, УИХ дахь АН-ын бүлгээс гарах хүсэлтээ Д.Эрдэнэбатад хүргүүлсэн юм. Ингэснээр УИХ дахь АН-ын бүлэг тарах эрсдэлд хүрнэ гэдгийг Ж.Батзандан, Л.Болд нар хэлсэн. Тэгвэл энэ асуудалд АН-ын бүлгийн дарга Д.Эрдэнэбат өнөөдөр хариулт өглөө.
-Засгийн газрыг огцруулах асуудлаар АН-ын бүлэг нэгдмэл байр сууриндаа хүрээгүй байсан уу?
-Засгийн газрыг огцруулах үйл явц гишүүдийн мөн чанарыг сайн таниуллаа. АН Засгийн газрыг огцруулах шаардлагыг долоон удаа тавьсан. Долоон удаагийн шаардлагад АН-ын бүлэг нэгдмэл байр суурьтай байсан гэдгийг би онцолж хэлмээр байна.
ЖДҮХС-аас зохион байгуулалттай, бүлэглэн хулгайлсан явдал нь гэмт хэргийн шинжтэй байгаа учраас АН-ын бүлэг энэ Засгийн газрыг огцруулах нь зүйтэй гэж үзсэн. Энэ байр сууриндаа өнөөдөр ч байгаа. ЖДҮ-ийн сантай холбоотой энэ гэмт үйлдлийг өөгшүүлэн хамгаалж болохгүй. Харамсалтай нь санал хураалтын үед манай гурван гишүүн эсрэг санал өгсөн.
-Л.Болд гишүүний хүсэлтийг хэрхэн шийдвэрлэх вэ?
-Л.Болд гишүүн өчигдөр надад бичиг хүргүүлсэн. Өнөөдөр Л.Болд АН-ын гишүүн хэвээрээ байгаа. Намын шийдвэрээр энэ үйлдэлд нь дөрөв хүртэлх жилээр улс төрийн хариуцлага оногдуулсан. Би үүнийг зөв гэж харж байгаа. Бүлгээс гарах хүсэлтийг нь хуулийн дагуу шийдэх ёстой. Гэтэл хуулийн заалттай нийцэхгүй байна. Тиймээс би Улсын дээд шүүхэд тайлбар явуулж байгаа. АН-ын суудалд сууж байгаа Л.Болд бол АН-ын гишүүн мөн. Тиймээс УИХ-ын хуулийн дагуу найман хүний суудалтай АН-ын бүлэг хэвээрээ үйл ажиллагаагаа үргэлжлүүлнэ. Хуулийн зөрчилтэй ийм хүсэлтэд АН-ын бүлгийн даргын хувьд ямар ч бичиг, мэдэгдлийг УИХ-ын даргад өгөхгүй. Тийм үндэслэл байхгүй. Би хууль зөрчих эрхгүй.
-Тэгвэл Л.Болд гишүүн АН-аас гарсан тохиолдолд л бүлэг тарна гэсэн үг үү?
-Намаас чөлөөлөгдвөл ийм эрсдэл үүсч болно. Гишүүн нам бус болж, бүлгээс гарвал бид 8-ын тоонд хүрэхгүй байгаа учраас бүлэг тарна. Бүлэг тарахыг хэн нэгэн хүн амныхаа зоргоор шийддэг асуудал биш. Бүлэг тарах хуулийн заалттай. Хэрвээ улс төрийн нам татан буугдсан бол эсвэл бүлэг өөрөө тарах шийдвэр гаргасан бол гэсэн хоёр заалтаар тарж болно. Түүнээс хэн нэгэн хүн бүлэг тар гэвэл тарчихдаг юм биш.
Ард түмэн АН-ыг сөрөг хүчин болгосон. Эрх баригчдын үйл ажиллагаанд хяналт тавь гэсэн үүрэг өгсөн. Бид энэ үүргээ хэрэгжүүлж байгаа. Л.Болд гишүүн парламентад олон удаа АН-ын нэрийн суудалд суусан. Туршлагатай парламентач. Ард түмнийг төлөөлж, сөрөг хүчний дуу хоолой болж байгаа бүлгийг тараах оролдлогыг санаатайгаар хийж болохгүй гэдгийг Л.Болд гишүүнд хэлмээр байна. АН-ын суудалд дээр сонгогдож орж ирээд бүлгээс гарна гэдэг тохиолдол анх удаа болж байгааг Л.Болд гишүүнд сануулж хэлмээр байна. Энэ бол ард түмний нам шүү. Сөрөг хүчин бүлэгтэй байж ард түмний дуу хоолой болж ажиллана гэдгийг санаж сэрэх ёстой.
-Гишүүдийн хэлж байгаагаар АН-ын удирдлагууд, тэр дундаа С.Эрдэнэ та хоёр МАНАН бүлэглэлийн эрх ашгийг хамгаалсан уу?
-60 тэрбумынхан, ЖДҮ-ийнхэн гэдэг нь үнэн гэдэгтээ АН санал зөрөхгүй байгаа. Эрэмбээрээ явсан зүйл дээр дөрөөлж, нэг хэсгийгээ гүтгэн доромжлоод, тэдэнтэй нийлсэн гэж ярьж болохгүй. Энэ УИХ болохгүй, хариуцлага ажиллаж байна гэсэн байр суурь илэрхийлсэн. Энэ УИХ 60 тэрбумаас бүрдсэн юм биш үү. Тиймээс тарах ёстой юм биш үү гэж би цаг үргэлж хэлж ирсэн. Энэ байр суурин дээрээ өнөөдөр ч байна. Засгийн газрын асуудал шийдэгдэж, нэг талдаа гарлаа. Гэхдээ бид ЖДҮХС-ын асуудлыг дахин дахин тавина. Бас 60 тэрбумын асуудалд УИХ-ын дарга холбоотой бол байр суурь хэвээрээ хадгалагдана. Эргэлзэх хэрэг огт байхгүй. Бид М.Энхболдыг хамгаалсан байр суурийг огт илэрхийлээгүй.
Б.Учрал