УИХ-ын үдээс өмнөх хуралдаан ирц бүрдээгүйгээс хуралдаж чадаагүй. Тиймээс УИХ-ын дарга М.Энхболд чуулганы хуралдааны хааж хэлсэн үгэндээ:

-Засгийн газраас Ашигт малтмалын тухай хуульд нэмэлт өөрчлөлт оруулах асуудлыг өргөн барьсан. Энэ асуудлыг УИХ хэлэлцэж эхлэх явцад УУХҮ-ийн сайд Д.Сумъяабазар чуулганы танхимд орж ирээгүйгээс гишүүд асуулт асууж, хариулт авч чадаагүй. Энэ асуудал хоёр өдөр хуралдаж чадсангүй УИХ-ыг ард түмэн сонгодог. Та биднийг тасралтгүй үйл  ажиллагаагаа явуулж, улс орны өмнө хүндэрч  байгаа бэрхшээлтэй асуудлыг шийдвэрлэж бай гэж ар түмэн сонгосон. 

Засгийн газрыг УИХ томилсон. Засгийн газрыг улс орны өмнө тулгамдсан асуудлыг шуурхай шийдвэрлэж, УИХ-д асуудлаа танилцуулж, тайлагнаж, ажиллах ёстой гэж томилсон. Засгийн газар, түүний тэргүүн Үндсэн хуульд заасны дагуу УИХ-д ажлаа тайлагнах хуультай. Гэтэл өнөөдөр УИХ-ын үйл ажиллагааг Засгийн газрын гишүүд, сайд нар үйл ажиллагаа явуулахгүй бойкотолж байна.

Бид бензин тос, валютын ханшийн асуудлыг Засгийн газраас асуугаад дөрөв дэх долоо хоног руугаа орж байна. Бид өргөн барьсан сайдыг нь томилж өгөх гээд гурав дахь долоо хоногтоо орж байна. Засгийн газрын тулгамдсан асуудлыг шийдвэрлэхэд УИХ бэлэн байна. Өнгөрсөн долоо хоногт Засгийн газартай хариуцлага тооцох асуудлыг УИХ хэлэлцээд УИХ-ын гишүүдийн олонх итгэл үзүүлж, ажлаа үргэлжлүүлж хийх шийдвэрийг гаргасан. Одоо улстөржилтөө зогсож, Засгийн газар ажлаа хийх ёстой цаг үе болсон.

Өнөөдөр Засгийн газар УИХ-ын үйл ажиллагааг тасалдуулж байдаг цаг үе биш. Гадна цаг агаар, өвөлжилтийн байдал ч амаргүй байна. Улс орны хэмжээнд уламжлалт мал  тооллогын ажил явагдаж байна. Энэ арга хэмжээг Засгийн газар анхааралдаа авч, Улаанбаатар хотын агаарын бохирдлын талаар ямар ямар арга хэмжээ авах гэж байгаа талаар УИХ-даа танилцуулж ажиллах ёстой. Тийм учраас Засгийн газрыг ажлаа шуурхай хийж, УИХ-ын үйл ажиллагааг тасалдуулахгүй явуулахыг би шаардаж байна. 

Засгийн газар хуулийн дагуу УИХ-д ажлаа танилцуулж, тайлагнаж байх ёстой. Төр тогтвортой байх ёстой. Үүний төлөө би явна. Төр тогтвортой байж ард түмэн тайван амгалан байна. Сүүлийн үед Үндсэн хуулийн бус аргаар төр, засгийн эрх мэдлийг авах гэсэн оролдлогуудыг эрээ цээргүй хийж байна. Үүнтэй бид хатуу тэмцэх ёстой. Олон түмнийг тэмцэлд уриалах, тэмцлийн хатуу хэлбэрийг сонгоно гэж олон түмнийг цочирдуулах үйл ажиллагаа, уриалга, лоозонг УИХ-ын гишүүд ярьж байна. Энэ бол Үндсэн хууль зөрчсөн асуудал гэж үзэж байна.

Сүүлийн үед "60 тэрбум" гэх хэргээр ЖДҮ-ийн хэргийг дарах оролдлого, сурталчилгааг ихэд хийх боллоо. Үүнийг би зогсоох ёстой гэж үзэж байна. "60 тэрбум" гэх хэргээр Төрийн байгуулалтын байнгын хорооны дарга хэлэлцүүлгээ хий. Ёсзүйн дэд хороо ЖДҮ-ийн асуудлаар дэд хороогоо хуралдуул. Хэрвээ дэд хороогоор хуралдуулахгүй бол ирэхгүй байгаа гишүүдээ бүрэлдэхүүнээсээ чөлөөлж, дараагийн гишүүдийг томил.

Намайг огцруулъя гэж байгаа бол хуулийн дагуу шаардлага, санал санаачлагаа бичээд албан ёсоор асуудлаа тавь. Хэвлэл мэдээллийн пиар болгож битгий ашигла. Төрийн ажил хуулийн дагуу явагдах ёстой. Бид хуульд нийцсэн үйл ажиллагааг л явуулах ёстой. Засгийн газрын УИХ-ын өмнө хүлээсэн үүргээ биелүүлж чадахгүй байгаагаас болоод УИХ-ын хоёр өдрийн үйл ажиллагаа явуулж чадсангүй. Би олон нийтээс уучлал хүсч байна. Өнөөдрийн хуралдаан хуралдах боломжгүй боллоо хэмээсэн юм. 

Н.Энх