БСШУС-ын сайд Ц.Цогзолмаа албан тушаалаа өгөх шийдвэртэй зэрэгцэн дараагийн сайдын нэр яригдаж эхэлсэн. УИХ-ын эмэгтэй гишүүдээс  эхлээд тус яамны Төрийн нарийн бичгийн даргын нэр яригдсан энэ албан тушаалын эзэн одоогоор тодорхойгүй байна.

Ийн сандал ширээний асуудалтай зэрэгцэн БСШУСЯ-ны Төрийн нарийн бичгийн дарга Б.Баярсайханы тухай цөөнгүй мэдээлэл олон нийтийн сүлжээгээр тархаад буй. Энэ бүхэнд тэрбээр өөрийн цахим хуудсаараа дамжуулан хариулт өгсөн байна. Ингэхдээ БСШУС-ын сайд болохгүй гэдгээ албан ёсоор мэдэгдсэн байна. 

Б.Баярсайхан цахим хуудсанаа

Сүүлийн өдрүүдэд миний талаар янз бүрийн гүтгэлэг, доромжлолоор дүүрэн худал мэдээллийг сошиалаар зохион байгуулалттай тарааж, санаатайгаар хувь хүний болон ажил хэргийн нэр хүндийг минь гутаан доромжилж байна. Хэдийгээр ул үндэсгүй, ой гутам энэхүү гүтгэлэг нь ухвар мөчид хэдхэн хүний дунд өрнөж байгааг үл тоож, тэвчээртэй өнгөрөөхийг хүссэн боловч эрхэлж байгаа төрийн албан тушаал, хамт олон, салбараа хүндлэн энэхүү тайлбарыг өгч байна. 

Юуны өмнө салбарын сайд болох гэж байна гэсэн мэдээллийг худал гэдгийг албан ёсоор мэдэгдье!

“Төрийн албыг орхиж, сайдын суудалд санаархаж байна” гэсэн ойлголтыг хэн нэгэнд өгөх зорилготойгоор тарааж байгаа ор үндэсгүй мэдээлэл юм. 

Өнөөдөр монгол хүн бүр шударга ёсоор цангаж байна. Миний бие ч төрийн албанд тэр тусмаа улс орны зүрх болсон боловсрол, соёл, шинжлэх ухаан, спортын салбарт авилгагүй, ашиг сонирхолгүй, хүнд сурталгүй, олон нийтийн төлөө үйлчлэх чадварлаг, ёс зүйтэй, сэтгэлтэй, зөв хандлагатай хамт олныг бий болгож, төрийн албыг цэвэр, ил тод, нээлттэй байлгахын төлөө чин сэтгэлээсээ хичээн ажиллаж байгаа гэдгээ бахархалтайгаар хэлж чадна. Үүнийг хэлж байгаагийн учир нь эдгээр зарчмуудыг барьж ажилласныхаа төлөө багагүй бэрхшээлтэй тулгарч байгаа. Тод жишээ нь энэхүү гүтгэлэг доромжлол мөн. Дарамт шахалт ч ирж байгаа...

Өөрсдийн хийсэн хууль бус үйлдлүүд, хулгай луйвраа далдлахын тулд нэр төр, хувийн орон зайд минь эрээ цээргүй халдаж байгаа хэсэг хүмүүсийн гэмт хэргийн чанартай энэхүү үйлдлийг хууль хяналтын байгууллагад шалгуулахаар өгсөн болно. 

Намайг нугарна, хугарна, гутрана шантрана гэж найдсан цөөхөн хүмүүст хандаж хэлэхэд намайг улам усалж, зоригийг минь чангалж өгсөнд баярлалаа. Би илүү ихийг, илүү сайныг, илүү зөвийг хийх болно. Гэрэл нь харанхуйг дийлж, үнэн нь худлыг ялна гэдэгт би итгэдэг. Хойч ирээдүй үр хүүхдүүдээ соён гэгээрүүлэх салбарт авлига, ашиг сонирхол байхыг үл тэвчинэ!!!" хэмээн бичжээ.

М.Болд