УИХ дахь АН-ын бүлэг мэдээлэл хийв. УИХ-ын гишүүн, АН-ын дарга С.Эрдэнэ:

-Өнөөдөр эрх барьж байгаа МАН-ыг эрх мэдлээ булаацалдаж байх хооронд Монгол Улсын нийгэм, эдийн засаг хүндэрлээ. Монгол Улсын гадаад өрийн асуудал хэмжээнээсээ хэтэрлээ. 2016 онд МАН-ын дэвшүүлж байсан "Өр нэмж тавихгүй, өрийг өрөөр дарахгүй. Мандуулна" гэсэн нь өнгөрсөн. Өнөөдөр МАН-ын дарга, Ерөнхий сайд У.Хүрэлсүх ярьдаг гуравхан ажилтай, гүйцэтгэл нэг ч байхгүй. Шатахуун үйлдвэрлэх үйлдвэр нь хэзээ баригдах, хэзээ ашиглалтад орох, хэзээ шатахуунаа гаргах нь бүү мэд, үлгэрийн яриатай. Цэвэрлэх байгууламж барьж байгаа гэвч эхэлсэн нь мэдэгдэхгүй, тендэр юу болж байгаа юм бүү мэд. Саарал ус, цэвэр усны ажлыг шийднэ гэсэн. Аль 2013 оны үед Мянганы хөгжлийн сангаас энэ чиглэлээр гэрээ хэлэлцээ яригдсан. Сая олон жил яригдсан хэлэлцээ дээр гарын үсэг зурсан. Өөр ямар ч хөрөнгө оруулалт, бүтээн байгуулалт байхгүй.  Нэг км ч зам ашиглалтад оруулсангүй, нэг ч бүтээн байгуулалт хийгдсэнгүй. Энэ оны хөрөнгө оруулалт, бүтээн байгуулалтын гүйцэтгэл маш муу байна. Хий  хоосон шуудай, шуудайгаар нь мөнгө цацаж, шударга үнэний төлөө зүтгэж байгаа баатар мэтээр өөрийгөө дөвийлгэх гэж байна. Хий хоосон зүйлээр ард түмэн хоолох юм уу, агаарын бохирдол арилах юм уу. 

Өнөөдрийн эрх баригчид сандал суудлаа ярьж, хэрүүл хийж байгаагаас нийслэлийн асуудал хамаагүй мэт аашилж байна. 

Бензин шатахууны үнийн өсөлт хэмжээгээ алдлаа. Нийслэлийн Засаг даргаа ид ачааллын үеэр огцрууллаа. Дараагийн Засаг дарга нь томилогдоогүй байна. Ард түмнийг тайвшруулах, тархийг нь угаах гэсэн явуургүй алхмаа боливол ямар вэ эрх баригчид аа хэмээв. 

УИХ-ын гишүүн З.Нарантуяа:

-Энэ Засгийн газар төсөв санхүүгийн хувьд таатай үед ажиллаж байгаа. Гэтэл гадаад валютын нөөцөө нэмэх тал дээр анхаарч ажиллахгүй байна. Бид ирэх жилүүдэд өр, зээлээ төлөх үүрэгтэй. Нийтдээ 12.2 тэрбум ам.долларыг бид төлөх ёстой. Үүнийг төлөхийн тулд гадаад валютынхаа улсын нөөцийг бүрдүүлэх ёстой. ОУВС гадаад валютын нөөцөө нэмэгдүүлэхгүй бол эрсдэлд орно гэж хэлсэн хэмээн мэдээлэв. 

Н.Энх