Прокурорын байгууллагаас ЖДҮХС-гийн зээлтэй холбогдуулан УИХ-ын нэр бүхий гишүүдийн бүрэн эрхийг түдгэлзүүлэх саналыг чуулганы хуралдаанд оруулж ирэх мэдээлэл гарсан. Энэ мэдээлэлд УИХ-ын гишүүн Э.Дамба-Очирын нэр дурдагдаж буй. Тэгвэл Э.Дамба-Очир гишүүн энэ мэдээллийг үгүйсгэлээ. Тэрбээр цахим хуудсаараа дамжуулан

Өнгөрсөн долоо хоногоос эхлэн надтай холбоотой, тодруулбал Улсын ерөнхий прокуророос эргүүлэн татах асуудлыг тавьсан гэх ташаа, илт гүтгэлэгийн шинжтэй мэдээллийг зарим хэвлэл мэдээллийн хэрэгслээр цацах боллоо. Өнөөдрийг хүртэл дуугүй харзнасан нь гэмт хэрэг хийсэн, үйлдсэн, холбогдсон гэсэн үг биш юм. УИХ-ын гишүүн надтай холбоотой хэмээн бичиж байгаа "Сапфир стоун" гэх ХХК надтай холбоогүй бөгөөд ЖДҮС-аас зээл авахад нөлөөлөөгүй гэдгийг хариуцлагатайгаар мэдэгдэж байна. Улс төрийн тогтвортой байдлыг сахиж, шударга бус зүйлсийн эсрэг зогсож Засгийн газрыг авч үлдэх кноп дарсныхаа төлөө ийнхүү гүтгэгдэнэ гэж төсөөлсөнгүй.

Зарим УИХ-ын гишүүн ЖДҮС-аас зээл өөрийн компанидаа, өөрийн хүүдээ, өөрийн дүүдээ авч өгсөн нь баримтаар нотлогдсон байхад, асуудлыг тэднээс холдуулж ямар ч хамааралгүй компани, ААНэгжийн нэр барьж холбоотой мэт бичиж байгаа нь улс төрийн сонирхол мөн гэдгийг илтгэж байна.

Иймээс улс төрийн нөхцөл байдлын улмаас үүдсэн элдэв гүтгэлэгт автахгүй байхыг хүсье" хэмээн бичжээ.

М.Болд