Төрийн байгуулалтын байнгын хороо 52.6 хувийн ирцтэйгээр хуралдлаа. Хуралдаанаар Сонгуулийн тухай хуульд өөрчлөлт оруулах тухай төсөл, Төрийн албан хаагчийн төлөөллийг сонгон шалгаруулах тогтоол болон бусад асуудлыг хэлэлцэхээр төлөвлөжээ. Байнгын хорооны гишүүд хэлэлцэх асуудалтай холбогдуулан горимын санал гарсангүй, баталлаа. Бусад асуудлын хүрээнд Л.Оюун-Эрдэнэ нарын нэр бүхий 40 гишүүний гарын үсэгтэй УИХ-ын даргыг огцруулах бичгийг УИХ-д өргөн барьсаныг хэлэлцэхээр боллоо. Үүнийг УИХ-ын дарга М.Энхболд Төрийн байгуулалтын байнгын хороонд шилжүүлжээ. Уг шаардлагад "УИХ-ын нэр бүхий 38 гишүүн гарын үсэг зурсан шаардлагыг 12 сарын 13-ны өдөр танд хүргүүлсэн. Өнөөдрийн байдлаар уг шаардлагад УИХ-ын гишүүн З.Нарантуяа, Я.Санжмятав нар нэмэгдэж, 40 гишүүн гарын үсэг зурлаа.
УИХ-ын дарга М.Энхболд та УИХ-ыг даргалах ёсзүйн эрхгүй гэж үзэж байгаа тул та УИХ-ын тухай хуульд заасны дагуу өөрийн хүсэлтээр ажлаасаа чөлөөлөгдөх хүсэлтээ гаргана уу. Таныг ажлаасаа чөлөөлөгдтөл нэр бүхий гишүүд бид чуулганы хуралдаанд оролцохгүй. Үүнээс учирч болох алвиаа эрсдлийг та хүлээх болно" гэж мэдэгдсэн байна.
Төрийн байгуулалтын байнгын хорооны дарга Д.Лүндээжанцан уг шаардлагыг танилцуулаад:
-Энэ асуудлыг Төрийн байгуулалтын байнгын хороогоор хэлэлцэх боломжгүй гэж бид үзэж байна. Учир нь УИХ-ын даргыг хэлэлцэх хоёр төрлийн заалт байна. Хугацаанаас нь өмнө чөлөөлөх, огцруулах эсэх асуудлыг хэлэлцэн холбогдох санал дүгнэлт гаргахын тулд УИХ-ын даргыг огцруулах, чөлөөлөх хуульд заасан таван үндэслэлийг хангасан байх ёстой. Үүнд нас барсан, өөр ажилд шилжсэн бусад шалтгаанаар чөлөөлөгдөх хүсэлтээ өөрөө гаргасныг УИХ хүлээн авсан, хүнд өвчний улмаас үүрэг ажлаа цаашид гүйцэтгэх боломжгүй болсон эмнэлгийн дүгнэлт гарсныг УИХ хүлээн авсан, ҮХЦ УИХ-ын даргыг огцруулах үндэслэлтэй гэснийг УИХ хүлээн авсан, гэмт хэрэг үйлдсэнийг шүүхээр тогтоосон зэрэг таван үндэслэлээр Төрийн байгуулалтын байнгын хороо хуралдах үндэслэл бүрдэнэ. Тиймээс Төрийн байгуулалтын байнгын хороо энэ удаад хэлэлцэх хуульзүйн үндэслэл байхгүй. УИХ-ын даргад хариуг нь өгнө. Энэ асуудлыг хэлэлцэх асуудлаас хаслаа. Хэрвээ албан бичиг дотроо аль нэг шийдвэрийн төсөл дагалдуулсан бол хэлэлцэх үндэслэлтэй эсэхийг хэлэлцэнэ. Тийм учраас бид энэ асуудлыг хэлэлцэх асуудлаас хасч байна хэмээлээ.
Н.Энх