БНХАУ-ын хуулийнхан хилс хэрэг тулгаж, шалтгаангүйгээр Канад улсын 13 иргэнийг баривчлаад буй талаар www.theguardian.com сайт мэдээллээ.
Уг мэдээллийг Канадын Гадаад хэргийн яам баталж, нэн даруй хууль бус үйдлээ зогсоохыг шаарджээ.
АНУ-ын Засгийн газрын хүсэлтээр Канадын тал өнгөрсөн оны арванхоёрдугаар сарын 1-нд Хятадын технологийн “Huawei” компанийн Санхүү эрхэлсэн захирал Мэн Ванжоуг баривчлан саатуулсан юм.
Энэхүү баривчилгаанаас хойш Хятадын тал канадчуудыг хоморголон баривчилж эхэлжээ.
Хоёр улс дипломат харилцааны хүрээнд дээрх баривчлагдсан иргэдийн наймыг сулласан байна. Бээжин нэг шинэ оны өмнө Сара Макайвер гэх багш бүсгүйг нутаг буцаасан юм.
Харин Канадын дипломатч асан Майкл Ковриг, бизнесмэн Майкл Спэвор нарыг суллахаас Бээжин эрс татгалзаж буй гэнэ. Учир нь тэднийг үндэсний аюулгүй байдалд заналхийлсэн хэмээн буруутгаж, шалгаж эхэлжээ.
Б.Дэлгэрцэцэг
Уншиж байна |