УИХ-ын гишүүн Ж.Батзандан, Л.Болд, Л.Оюун-Эрдэнэ, Т.Аюурсайхан, Х.Нямбаатар нар Төрийн ордонд мэдээлэл хийлээ. Тэд МАНАН дэглэмийн эсрэг бүх нийтийн жагсаалыг энэ сарын 10-нд хийхээр төлөвлөжээ. УИХ-ын гишүүн Т.Аюурсайхан:

-УИХ-ын дарга М.Энхболдыг ёсзүйн хариуцлага хүлээж, чөлөөлөгдөх хүсэлт гаргахыг шаардсан. Үүнээс хойш УИХ-ын чуулганы болон байнгын хороодын хурал хуралдахгүй өнөөдрийг хүрлээ. Дараагаар нь нэр бүхий 40 гишүүд УИХ-ыг даргыг огцруулах шаардлага тавьсанаас хойш нэг сарын хугацаа өнгөрсөн байна. Гэвч хуулийн үндэслэл нэхээд сууж байна. Өнөөдөр Монголд ёсзүйт, олон нийтийн шаардлагыг хэрэгжүүлдэг төр хэрэгтэй. МАНАН дэглэмийг устгая жагсаал хийсэн. Маш олон иргэд ирсэн. Харамсалтай нь МАНАН дэглэмийнхэн ард түмнээ доромжлон тохуурхаж байна. 

Нэгдүгээр сарын 10-ны өдөр эсэргүүцлийн тайван жагсаал, цуглаан зохион байгуулна. 21 аймгийн төв талбайд бидний нэгдсэн тэмцэл, жагсаалыг хийнэ.

УИХ-ын гишүүн Л.Болд:

-Бид өмнөх жагсаалын үр дүнгийн талаар мэдээлэл хийхээр төрийн бус байгууллагын төлөөллөө оролцуулах байсан. Гэвч Төрийн ордонд нэвтрэх эрх олгосонгүй. Бид УИХ-ын дарга М.Энхболдыг сайн дураарай суудлаасаа чөлөөл гэдэг шаардлага тавьж байгаа. Гэвч бул хар чулуу шиг албан тушаалдаа суусаар байна. Сүхбаатарын талбайд өвлийн хувцастай гурван мянган хүн цуглалаа гэж доромжилж байна. Бид энэ удаад жагсаалаа хийж, улс төрийн суулт хийж, шаардлагаа ялалтад хүртэл сууна.  Сүхбаатарын талбайд гэр барьж, өлсгөлөн зарлахад оролцохоо мэдэгдсэн. УИХ-ын гишүүд бид улс төрийн суулт хийнэ. Гэхдээ энэ удаа биш. Стратегийн ордуудыг төр, ард түмний мэдэлд өгнө. 

УИХ-ын гишүүн Ж.Батзандан:

-2018 онд эхэлсэн тэмцэл маань 2019 онд амжилтанд хүрнэ гэдэгт итгэлтэй байна. Нохой жилд эхлүүлсэн тэмцэл гахай жилд ялалтанд хүрнэ гэдэгт итгэлтэй байна. МАНАН дэглэм Манжийн хааны татвараас их татварыг, мөлжлөгийг монголчуудаас авч байна. Ганц хүнийг унагаагаад юу өөрчлөгдөх юм гэж байсан. Манжийн дэглэмийг нураахын тулд эхлээд Манжийн амбанг хөөж явуулсан. Амбаныг нь хөөж явуулахгүйгээр манжийн дэглэм нурахгүй байсан. Тогтолцоог хамгаалж байгаа дарга нарыг нэн тэргүүнд зайлуулах ёстой. 1990 онд Сүхбаатарын талбайд олон мянган хүн жагсахад 2000 хүн ирлээ гэж коммуннистууд хэлж байсан. 

Бид МАНАН дэглэмд сануулга өгсөн. Одоо хариуцлагатай жагсаал байх болно. Сүхбаатарын талбайд 200 гэр барьж, улс төрийн суулт, өлсгөлөн зарлана.

УИХ-ын гишүүд Л.Оюун-Эрдэнэ:

-Өвлийн хүйтэнд жагссан хүмүүсийг зохион байгуулалттай ирсэн байна, зузаан хувцас өмссөн учир олон болсон байна гэж гүтгэж болохгүй. Шударга ёсыг хүсэмжилсэн улс төрийн тохироо бүрдээд байна. Бид энэ хүлээлтэд хариулт өгөх ёстой. 

Бид энэ бүлэглэлийг зогсоохоос өөр гарц байхгүй болж байна. Улс төрийн тогтвортой байдал, төслийг хэрэгжүүлэхгүй бол болохгүй байна. Харамсалтай нь ард түмнийг цагаан цаас гэж бодож, жагсаалыг мөнгөөр хийж байна гэж итгэсэн нөхцөл байдлаасаа гарахгүй байгаа учраас бид дахин жагсаал хийх гэж байна. Бид олон улсын байгууллагад хүртэл мэдэгдэнэ. 

Энэ хэвлэлийн хуралд иргэд, төрийн бус байгууллагын төлөөлөл оролцлоо. Тэд “Би ээжүүдийнээ төлөөлөн ярьж байна. УИХ-ын даргаар буглаад суугаад байгаа нөхрөө татаж аваач гэсэн захиаг УИХ-ын дарга М.Энхболдын гэргий н.Туяацэцэгт өгөхөөр Их тэнгэрийн аманд өгөхөөр очсон юм. Гэтэл бидний өөдөөс рот цэрэг явуулсан.

Тиймээс бид энэ хар хүйтэнд суулт, өлсгөлөн зарлахаар амь биеэ хайрлахгүй тэмцэнэ. Монгол эхчүүд үр хүүхдийнхээ төлөө халуун гал, хүйтэн ус руу орохоос ч айдаггүй. УИХ-ын гишүүд бидэнтэй хамт өлсгөлөн зарлана гэж байна. Бид энэ сайхан залуучуудаа өлсгөлөн зарлуулж суулгамааргүй байна. Тиймээс эхний ээлжинд эхчүүд бид суулт хийж өлсгөлөн зарлана. Тиймээс биднийг өлсгөлсөн зарлатал битгий тэмцүүлээрэй, М.Энхболд оо” гэсэн юм. Тэд мэдээлэл хийснийхээ дараа сэтгүүлчдийн асуултад хариуллаа.

-УИХ-ын даргыг гишүүдийн олонхийн саналаар огцруулах төслийг Ерөнхийлөгч өргөн барьсан. Тиймээс жагсаал хийх шаардлага бий юу?

УИХ-ын гишүүн Т.Аюурсайхан:

-УИХ-ын даргыг гишүүдийн олонхийн саналаар огцруулах хуулийн төслийг Ерөнхийлөгч өргөн барьсан. Үүнд хоёр асуудал байгаа. Төрийн байгуулалтын байнгын хороон дээр үүнийг хууль санаачлагчид нь буцаах эрсдэлтэй. Мөн чуулганаар хэлэлцээд явахад УИХ дахь АН-ын бүлэг завсарлага авах магадлалтай. Хууль батлагдлаа гэхэд Ерөнхийлөгч хориг тавих, Төрийн мэдээлэл сэтгүүл дээр хэвлэгдэх гээд олон шат дараатай. Тиймээс энэ чуулганы хугацаанд батлагдахгүй, хаврын чуулган хүргэх магадлалтай. 

УИХ-ын гишүүн Ж.Батзандан:

-Жагсаал цуглаанд үймээн самуунд дэгдээх зорилготой хүмүүсийг оруулж байгаа. Бид цаг ямагт цагдаагийн байгууллагатай хамтарч байгаа. Монголын ард түмэн тэмцэж, эвлэлдэн нэгдэх хэрэгтэй. Үүнийг МАНАН, мафи зогсоож чадахгүй. МАНАН-гаас салж байж Монгол ялна. Ард түмний тэмцлийг төрийн дээд удирдлагууд дэмжиж байгаа. МАНАН бүлэглэлийг нураахгүй бол монголчууд хэзээ ч утаанаас салахгүй. 

-Та бүхэнд шаардлага, тэмцэл хийснээсээ хойш төрийн удирдлагуудтай уулзсан уу?

УИХ-ын гишүүн Ж.Батзандан:

-Ерөнхийлөгчтэйгээ, Ерөнхий сайдтайгаа, УИХ-ынхаа 40 гишүүнтэй уулзахгүйгээр МАНАН-гийн эсрэг тэмцэлд ялалт байгуулах ямар ч боломжгүй. Манжийн эсрэг тэмцэлд манай хувьсгалчид Богд хаантайгаа өдөр болгон уулзаж байсан. Өнөөдрийн Монголын ард түмнийг Монголын төрийн өндөрлөгүүд, удирдлагууд бүгдээрээ дэмжиж байгааг хэлье. 

Н.Энх