УИХ-ын гишүүн Ж.Батзандан, Л.Болд, Л.Оюун-Эрдэнэ, Т.Аюурсайхан, Х.Нямбаатар нар мэдээлэл өглөө. Тэд УИХ-ын 39 гишүүний гарын үсэгтэй, УИХ-ын даргыг огцруулах тухай тогтоолын төслийг өргөн барьж буйгаа мэдээлэв. Гарын үсгээ зурсан 39 гишүүн дээр УИХ-ын гишүүн З.Нарантуяа нэмэгдэх аж. Тэрбээр орон нутагт томилолттой яваа учраас албан бичгээр саналаа гаргах юм байна.
Тэд УИХ-ын дарга М.Энхболдтой уулзаж, уг тогтоолын төслийг өнөөдрийн чуулганы нэгдсэн хуралдаанаар хэлэлцэж өгөөч гэсэн хүсэлтийг тавьсан байна. Харин УИХ-ын дарга М.Энхболд ирэх мягмар гариг хүртэл хүлээх нөхцөл байдал үүссэн гэх тайлбарыг өгчээ. Тиймээс гишүүд чуулганы нэгдсэн хуралдаанд горимын санал гаргах, УИХ-ын даргын зөвлөлийг хуралдуулах шаардлага үүссэнийг УИХ-ын гишүүн Л.Оюун-Эрдэнэ хэлж байна. Мөн тэрбээр шаардлагатай бол өнөөдрийн чуулганы нэгдсэн хуралдааныг дахин бойкотолно гэв.
Б.Учрал