Оюутолгой компанийн Үйлдвэрчний эвлэлийн хорооноос мэдээлэл хийлээ. Оюутолгой компани АШУИС-ийн дэргэдэх Эрүүл мэнд, орчин судлалын институтаар хөдөлмөрийн хэвийн бус нөхцөлийн үнэлгээ хийлгэжээ. Үнэлгээний дүгнэлтийг үндэслэн Оюутолгой компани ажилчдынхаа хэвийн бус нөхцөлийн нэмэгдлийг хассан байна. Гэвч үнэлгээ хийсэн АШУИС-ийн дэргэдэх Эрүүл мэнд, орчин судлалын институт нь хэвийн бус ажлын байр, хөдөлмөрийн нөхцөлийн үнэлгээ хийх эрхгүйг нь тогтоосон байна. Энэ асуудлаар тус байгууллагад хандахад хэвийн бус нөхцөлийн үнэлгээ нь ажилчдын цалин хасах үндэслэл болохгүй гэсэн албан ёсны хариуг өгчээ.

Тиймээс ҮЭХ-ноос энэ байдлыг Оюутолгой компанид мэдэгдэж, ажилчдын хувийн бус нөхцөлийн нэмэгдлийг буцаан олгуулах хүсэлт тавьсан ч хүлээж аваагүй байна. Оюутолгой компанийн зүгээс “Монгол Улсын хууль тогтоомжийн тодорхойгүй байдлаас үүссэн асуудал” хэмээн хүлээж аваагүй аж. Үүнийг тус компанийн ҮЭХ-ноос “Монгол Улсын хууль тогтоомжийг үл харгалзан зардлаа хэмнэхээр монгол ажилчдын хэвийн бус нөхцөлийн нэмэгдлийг хассан. Бид сүүлийн 6 сарын турш Оюутолгой компанийн захиргаанд албан ёсоор мэдэгдэж, уулзалт хийж ярилцсан ч шийдэлд хүрээгүй. Тиймээс бид Сүхбаатарын дүүргийн Засаг даргад хөдөлмөрийн хамтын маргаан үүсэх хүсэлт өгсөн. Хүсэлтийн дагуу хамтын маргаан үүсгэж, хөдөлмөрийн зууч томилсон. Үүнд Оюутолгой компани оролцоогүй. Дараагийн шат болох хөдөлмөрийн арбитр томилоход мөн л оролцоогүй. Харин Оюутолгой компани Сүхбаатар дүүргийн Засаг даргыг үндэслэлгүйгээр хөдөлмөрийн хамтын маргаан үүсгэсэн хэмээн нийслэлийн Захиргааны хэргийн шүүхэд гомдол гаргасан. Асуудлыг шийдэх гэсэн манай арга хэмжээг шат шатанд нь зогсоох гэж байна” гэсэн мэдээллийг өглөө.

Оюутолгойн байгаль орчны тайланд сүүлийн долоон жилд Оюутолгойн уурхайн талбарын тоосжилтын хэмжээ дундажаас дээш буюу хүнд хортой гэсэн дүгнэлт гарсан байдаг. Тиймээс тухайн ажлын талбар нь хэвийн байх ямар үндэслэлгүй гэдгийг тэд нэмж хэллээ.

М.Болд