“Эрдэнэт”-ийн 49 хувийг гадаадын компанид шилжүүлэх гэж байна гэх баримтыг УИХ-ын гишүүн Л.Оюун-Эрдэнэ дэлгэсэн ч Монголын зэс корпорациас энэ мэдээллийг үгүйсгэсэн юм.
Тэгвэл өнөөдөр энэ асуудлаар УИХ-ын гишүүн Т.Аюурсайхан мэдээлэл хийлээ. УИХ-ын нэр бүхий гишүүд “Эрдэнэт”-ийн 49 хувийг Сингапурт бүртгэлтэй ERDENET CORP PTE LTD компанид шилжүүлсэн гэх асуудлаар Ерөнхий сайд У.Хүрэлсүхэд хандаж, асуулт тавьсан байна. Тэд хариугаа өчигдөр авчээ.
УИХ-ын гишүүн Т.Аюурсайхан: 2019 оны 01 сарын 14-ний өдөр Монголын зэс корпорациас улсын бүртгэлийн газарт хандаж, эзэмшлийн нийт хувьцаагаа ERDENET CORP PTE LTD компанид шилжүүлэхээр 88 хуудас материалыг бүрдүүлж хүргүүлсэн. Иргэн Ц.Пүрэвтүвшин Монголын зэс корпорацийн нийт хувьцаагаа Сингапур улсад байгуулсан ERDENET CORP PTE LTD компанид шилжүүлэх хүсэлт гаргасан байна. Ингэхдээ хоёр компанийн хооронд гэрээ байгуулж, нийт хувьцаагаа 112 тэрбум 1 сая төгрөгөөр үнэлсэн.
ERDENET CORP PTE LTD компаниас 01 дүгээр сарын 16-ны өдөр хувьцаа шилжүүлэх урьдчилгаа төлбөр болгож 80 326 сингапур долларыг, 17-ны өдөр 50 мянган ам.долларыг иргэн Ц.Пүрэвтүвшингийн хувийн дансанд шилжүүлсэн байна. Нэр бүхий гишүүдийн өгч байсан мэдээлэл үнэн бодит болох нь үүгээр нотлогдож байна гэсэн мэдээллийг өглөө.
Мөн тэрбээр улсын бүртгэлийн байгууллагаас иргэн Ц.Пүрэвтүвшингийн хувьцаа шилжүүлэх хүсэлтэд татгалзсан хариу өгч, 88 хуудас материалыг нь буцаасныг хэллээ. Ингэснээр өнөөдрийн байдлаар Эрдэнэт үйлдвэр ХХК, Монголросцветмет ХХК 100 хувь төрийн өмчит хуулийн этгээд хэлбэрээр улсын бүртгэлийн мэдээллийн санд байгаа аж.
М.Болд
Уншиж байна |