ШШГЕГ-ын 461-р ангид саатуулагдаж байсан шүүгч амиа алдсан харамсалтай хэрэг нийгмийг цочроогоод байгаа. Хуулийн байгууллага хариуцлага алдсан энэ үйлдэлд салбарын сайдыг огцрахыг шаардаж байна. Үүнтэй ХЗДХ-ийн сайд Ц.Нямдоржоос зарим зүйлийг тодрууллаа.
-Хорих ангид саатуулагдсан иргэн амиа алдсан хэрэг олныг цочроож байна. Хорих ангийнхны дотоод журам алдагдсаныг салбарын сайдын хувьд та юу гэж үзэж байна вэ?
-Одоогоор шалгалт хийгдэж байна. Шалгалтын дүн гарсны дараа хариуцлагын асуудлыг ярина. Энэ асуудлаар одоогоор хоёр ажлын хэсэг гараад ажиллаж байна. Тодруулбал, Хоригдож байсан хүн нас барсан асуудлаар эрүүгийн хэрэг үүсгэн шалгагдаж байгаа . Ямар шалтгаантай нас барсан, яагаад нас барсан талаар шалгалт явуулж байна. Түүнээс гадна ШШГЕГ-т хяналт, шалгалт оруулаад ажиллаж байна. Энэ шалгалтын дүн өнөөдөр эцэслэн гарах байх. Хууль шалгалтын дүн тодорхой болох үед нь асуудал ярина.
-Энэ хэрэгтэй холбоотой хэн нэг албан тушаалтанд хариуцлага хүлээлгэсэн үү?
-Дотоод хяналт болон эрүүгийн хэрэг үүсгэсэн хоёр шалгалтын дүн гараагүй байна. Шалгалтын дүн гарч ирээгүй байхад хариуцлага ярихад мөчид цаг хугацааны хайч бий болоод байна.
-Талийгаачийг амиа хорлох хүн биш байсан гэж гэр бүлийнх нь хэлж байгаа?
-Шалгалтын дүн гарч байж л хуулийн байгууллага эцэслэнэ. Ийм эмзэг асуудлаар аль аль талаасаа буруу мэдээлэл цацаж, бурхан болсон хүнийг хамгаалж байгаа юм шиг дүр эсгэж бүр доромжлоод байж болохгүй. Хүний амьдралын ийм эмзэг асуудал дээр маш болгоомжтой хандах ёстой.
-Талийгаачийг Салхитын мөнгөний ордтой холбоотойгоор саатуулсан ч шүүгч хүүтэй нь бас холбоотой гэх мэдээлэл гараад байгаа?
-Энэ асуудлыг АТГ шалгаж, шөнийн 03.00 цагт саатуулж, маргааш нь авч явж байцаасан гэх мэт сэтгэл санааны хүнд байдал байж байгаад л энэ осол гарсан. Тэр шалгалт нь зөв явагдсан, буруу явагдсан гэдэгт прокурор хяналт тавьдаг.
-Хуульчийнх нь хувьд та талийгаач Л.Бямбааг хэр сайн мэдэх вэ?
-Би танина, бид хамтдаа Улсын прокурорт нэг конторт сууж байсан. 10 гаруй жил нэг конторт ажилласан.
-Алба хааж байсан цэрэг зэвсэгтэй оргож, ОХУ-ын нутаг дэвсгэрт амиа алдсан хэрэг гарсан. Энэ хэргийн шалгалтын явц ямар байна вэ ?
-ОХУ-ын тал шалгаад материалаа манай талд өгөөгүй байна. Мөн хил дотор гарсан асуудал нь цагдаагийн журмаар шалгагдаж байгаа. Энэ хоёр талд гарсан дүгнэлтийг нэгтгэж байгаад мэдээлэл өгнө байх.
-Сүүлийн үед гарсан нийгмийг цочроосон хэргүүдэд салбарын сайд хариуцлага хүлээж огцрох ёстой гэх шүүмжлэл байна. Энэ талаар...?
-Ийм асуудалд ул суурьтай хандахгүй бол хүн хэлмэгдлүүлж, хохироох гээд байдаг. Хариуцлага тооцох асуудлыг сүүлийн хоёр, гурав хоногт л над руу чиглүүллээ. Би хариуцлага тооцох нь тооцно. Гэхдээ яг ном журмаар нь асуудалд хандана. Энэ асуудал хариуцлага алдсан эсэх дүгнэлтийг хууль хяналтынхан дүгнэлт гаргасан тохиолдолд тийм тийм хүн хариуцлага алдсан гэдгийг нь тогтоож, хариуцлага тооцно гэж бодож байна. Хэн хариуцлага хүлээх ёстой вэ гэдэг нь тогтоогдоно. Харин намайг хариуцлага тооц гэж байгаа зүйл бол захиалгатай зүйл. Намайг ажлаа өг гэж байгаа бол шал өөр зорилготой, өөр асуудал хурц хэлбэрээр илэрч гарч ирж дугуй эргэчих гээд байгаа учраас тэрнээс өрсөж, далимдуулж байгаа зүйлүүд бий.
Н.Энх