“Дархандаа сайхан амьдарцгаая” ТББ-уудын төлөөлөл өнөөдөр мэдээлэл хийлээ. Тэд Дарханы төмөрлөгийн үйлдвэрийг хувьцаанаас дарханчуудад эзэмшүүлэх шаардлагыг тавьж байна. Учир нь 2006 онд хувийн компанид шилжсэн байсан Дарханы төмөрлөгийн үйлдвэрийн лицензыг дарханчууд тэмцэж байж буцааж авсан. Тиймээс Дарханы 100 мянган иргэн хувьцаа эзэмшүүлэхийг шаардаж буй аж.
Энэ талаар “Шинэ хараа гол” ТББ-ын тэргүүн Мөнхболд “Бид Хятадын 100 хувийн хөрөнгө оруулалттай компанид лиценз шилжсэн байхад нь Дарханы төмөрлөгийн үйлдвэрт эргүүлж авч өгч байсан. 28 хоног тэмцэж байж, ашиглалтын А39, А40 лицензийг Төмөрлөгийн үйлдвэрт шилжүүлсэн. Харамсалтай нь бид зөөдөг хятадаас зөөдөг монголд аваад өгчихсөн байна. Тухайн үед төмөрлөгийн үйлдвэрийн ажилчид Дархандаа хамгийн өндөр цалинтай, хүн бүр тэнд орохыг мөрөөддөг хүсдэг байсан.
Өнөөдрийн байдлаар төмөрлөгийн үйлдвэр концессын гэрээ нэртэйгээр менежментийн хувьчлалаар нэг компанид очсон. Ган үйлдвэрлэх нь битгий хэл ажилчдаа сул зогсоож байна” гэсэн мэдээллийг өглөө.
“Эрдэнэт”-ийн араас Дарханы төмөрлөгийн үйлдвэрийг барьцаанд тавьчихаж магадгүй. Тиймээс нээлттэй хувьцаат компани болж, зөвхөн Дарханы иргэдэд хувьцаа эзэмшүүлэх шаардлагатайг тэд хэлж байна.
М.Болд