Засгийн газрын шийдвэрээр гуравдугаар сарын 1-нээс улс даяараа байгальд хамгийн их хор хөнөөлтэй гэгдэх нийлэг уутнаас татгалзаад байна. Гэвч “Сурсан зүйлийг сураар боож болохгүй” гэгчээр худалдааны газраар үйлчлүүлээд гарахдаа “Тор өгөөч” гэдэг нэхэлтэй асуултыг иргэд тавьсаар байна.
Нийлэг уут буюу нэг удаагийн гялгар уут хэрэглэхийг хориглосон Засгийн газрын тогтоолын талаар сонсоогүй хүмүүс ч цөөнгүй байх юм. Худалдан авалт хийсэн даруйдаа уут сураглахад дэлгүүрийн худалдагч “Гялгар уут өгвөл торгоно гэсэн. Уут байхгүй” хэмээхэд худалдан авагч гайхаж, бухимдангуй гарч одох аж.
Ирэх гуравдугаар сарын 1-нээс нийлэг уут хэрэглүүлэхгүй гэж олон нийтийн мэдээллийн сувгаар өнгөрөгч оны зургадугаар сараас энэ оны гуравдугаар сарын 1-нийг хүртэлх хугацаанд мэдээ, мэдээлэл хангалттай цацсан. Гэвч нийлэг уутыг хэрэглээнээс хасахад бэлтгэл базаасан иргэн тун цөөн аж.
Харин Сонгинохайрхан дүүрэгт байрлах “Шөнийн зах худалдааны төвийн мах, махан бүтээгдэхүүний болоод гурил, гурилан бүтээгдэхүүний худалдагчид нийтлэг уутаар үйлчилсэн хэвээр байна. Хориглосон тогтоолыг эргэн сануулахад “Нэгэнт авчихсан уут, тороороо иргэдэд үйлчлээд дуусгана. Худалдан авагчдад уут тороо бэлдэж ирээрэй гэж сануулаад буцааж байгаа” гэв.
“Даавуун уут байгаа ч өнөөхөө мартчихаад байх юм” хэмээн нэгэн өндөр настан хэлж байна. Бас “Бүх гялгар уутны хэрэглээг хориглоогүйгээс хойш ямар нэгэн байдлаар гялгар уут хэрэглэж л таарна. Хэн гялгар уутны өргөн нарийныг хэмжээд зогсож байхав дээ” гэж хижээл насны ах ундуйцахтай ч таарлаа.
Манай Улс ч нийлэг уутны хэрэглээг хумих ажлыг эхлүүлж Засгийн газрын 2018 оны 6 дугаар сарын 20-ны өдрийн тогтоолоор 2019 оны 3 сарын 1-ээс бүх төрлийн 0.035 мм болон түүнээс нимгэн нэг удаагийн нийлэг хальсан уутыг худалдаа, үйлчилгээнд сав баглаа боодлын зориулалтаар үйлдвэрлэх, импортлохийг хориглосон.
Нийслэлийн Мэргэжлийн хяналтын газраас Засгийн газрын тогтоолын хэрэгжилтийг хангуулах ажлын хүрээнд нийслэлд худалдаа, үйлчилгээ эрхлэгч аж ахуйн нэгж, байгууллага, иргэдэд мэдэгдэл хүргүүлж, худалдаа, үйлчилгээнд ашиглагдаж буй 300 гаруй төрлийн нийлэг уутанд хэмжилт хийсэн байна. Зориулалтын багажаар хийсэн хэмжилтээр 64,5 хувь нь шаардлага хангасан аж.
Тэгэхээр нийлэг уутны ихэнх хувийг хэрэглэж болохуйц гэдгийг мэргэжлийн байгууллага дүгнэжээ.
Г.Сүрэн