АН-аас цаг үеийн асуудлаар мэдээлэл хийлээ. АН-ын Ерөнхий нарийн бичгийн дарга Ц.Туваан:

-Манай намд байсан Н.Алтанхуяг, Ж.Батзандан нар сүүлийн үед  АН-ын эсрэг гүтгэлгийн шинж чанартай мэдээлэл тарааж байгаа. АН-ын удирдлагыг "Эрдэнэт"-ийн 49 хувь, "60 тэрбум"-ийн асуудалд холбоотой мэтээр ярьж байгаа. АН ЖДҮХС-гаас мөнгө завшсан УИХ-ын гишүүдэд хариуцлага тооцох, "Эрдэнэт"-ийн асуудалд хуулийн дагуу шийдвэрлүүлэх байр суурьтай байгаа. Сүүлийн үед хэвлэлээр гарч байгаа асуудал үнэнд нийцэхгүй. 

Эрх баригчид АН ажил хийлгэхгүй байна гэж халхавчилж байна. 64 суудалтай эрх баригч хүчин ажлаа хий. Манай нам бүх зүйлийг хууль, шүүхийн байгууллагаар эцэслэн тогтоогдсон тохиолдолд буруутай гэж үзнэ. Буруутай тохиолдолд хаацайлж хамгаалахгүй гэдгээ мэдэгдэж байна гэлээ. 

АН-ын нарийн бичгийн дарга О.Магнай "Сүүлийн үед болж байгаа үйл явдалд АН байр сууриа илэрхийлж байна. Сүүлийн үед сошиалаар АН-ыг "60 тэрбум", "Эрдэнэт"-ийн 49 хувьтай холбоотой асуудлыг хамгаалж байна гэсэн мэдээлэл гарлаа. АН энэ асуудлыг хамгаалах боломжгүй. Шалгах асуудал байвал хууль, хяналтын байгууллагаар шалгуулж, хариуцлага хүлээх ёстой. 

Өнөөдөр УИХ-д 64 суудалтай эрх баригч улс төрийн хүчин МАН төрийн эрх барьж байна. Тиймээс эрх барьж байгаа МАН-ын удирдлагууд ажлаа хий хэмээлээ. Тэд мэдээлэл хийснийхээ дараа сэтгүүлчдийн асуултад хариулав.  

-"Эрдэнэт"-ийн 49 хувийн асуудлаар тухайн үед эрх барьж байсан АН-ын удирдлагууд шийдвэр гаргасан байна. Тиймээс та бүхэн намын удирдлагууддаа хариуцлага тооцох уу?

-Засгийн газрын хуралдааны тэмдэглэлд С.Эрдэнэ даргын нэр байгаагүй. Харин Д.Эрдэнэбат гишүүнтэй холбоотой мэдээлэл байсан. Хэрвээ хариуцлага тооцох ёстой бол хариуцлага тооц. 

"Эрдэнэт"-ийн 49 хувьтай холбоотой Засгийн газрын  хуралдааны тэмдэглэлийг ил болгох шийдвэр гаргалаа гэж мэдээлсэн. Үүнтэй зэрэгцээд телевизээр нэвтрүүлэг гарсан. Гэхдээ телевизийн нэвтрүүлэг бүрэн итгэх боломжгүй. АН-ын хувьд гэмт үйлдэл хийсэн бол улс төрийн хамгаалалт байхгүй.

-"Эрдэнэт" үйлдвэрт онц байдал зарласныг юу гэж хүлээж авч байна вэ?

-Сүүлийн үед ЗГХЭГ-ын дарга Л.Оюун-Эрдэнэ хууль, шүүх, прокурорын үүргийг бүгдийг хамтад нь гүйцэтгэж байна.  Л.Оюун-Эрдэнэ ЗГХЭГ-ын дарга болсоноосоо хойш 1992 оны хувьчлалыг шалгана, тэрийг шоронд хийнэ, байцаана гэдэг боллоо. Цаашдаа Л.Оюун-Эрдэнэ гэмт хэргийн чиглэлээр мэргэшиж ажилламаар байгаа бол  АТГ-ын дарга, ЦЕГ-ын дарга, Улсын ерөнхий прокуророор тавибал илүү зохихоор харагдаж байна.

-Засгийн газрын үйл ажиллагааг юу гэж дүгнэж байна вэ?

-МАН-ын амлалт өнгөрсөн хугацаанд биелээгүй. Хоёр Засгийн газраа сольж, БСШУС-ын, ЗТХ-ийн сайдыг дөрвөн удаа томилоод байна. МАН амлалтаа биелүүлээгүй, гэвч харамсалтай нь орой бүр популизм хийж, хэн нэг хүний хөөсрөл рүү анхаарал хандуулж байна. 

Хамт казино тоглодог найзаа УИХ-ын даргаар томилж, дүүгээ ЗГХЭГ-ын даргаар болгочихоод У.Хүрэлсүх өөрийгөө "шүдгүй" гэж болохгүй. Хамгийн хурц шүд У.Хүрэлсүхэд байна. АН ажил хийлгэхгүй байна гэж ярьж байгаа нь эрх баригчдын зүгээс туйлын хариуцлагагүй мэдэгдэл. 

-УИХ-ын гишүүн Л.Болд албан ёсоор намаасаа гарсан уу?

-Л.Болд гишүүний асуудлыг удахгүй шийднэ. 

Н.Энх