УИХ-ын чуулганы нэгдсэн хуралдаан хуралдав. Хуралдаанаар Шүүгчийн эрхзүйн байдлын тухай хуулийн төслийн эцсийн хэлэлцүүлгийг хийж байна. Хэлэлцэж байгаа асуудалтай холбогдуулан гишүүд асуулт тавьж хариулт авлаа.

УИХ-ын гишүүн Л.Энх-Амгалан:

-Үнэхээр аймшигтай зүйл байна. Монголын ард түмэн нэг хэсэг нь хуулийн дээр, нэг хэсэг нь хуулийн дор амьдарч байна. Тамлуулсан, тарчлуулсан гэр бүлийнхээс Монголын төр уучлал гуйх ёстой. Хүмүүсийг хилс хэрэгт гүтгэсэн, зандалсан хүмүүс Монгол Улсад хууль засаглал гэж байдаг бол хамгийн дээд ял хүлээх ёстой. Гэхдээ Монгол Улсыг хуулийн засаглалгүй болгох энэ хуулийг бүхэлд нь баталж болохгүй. Энэ хуулиар том хаалга  нээх вий гэж айж бана. Цаашдаа Монгол Улс хуулийн засаглалтай байх уу, үгүй юу гэдгийн өмнө ирээд байна. Төрийг хууль гацаадаггүй, хуулийг хүн гацаадаг гэж Б.Чимид гуай хэлсэн. Дарангуйлалын тогтолцоо руу шилжих вий гэж болгоомжилж байна. 

Ийнхүү гишүүд үг хэллээ. Дараагаар нь Хуульзүйн байнгын хорооноос гарсан зарчмын зөрүүтэй саналаар санал хураалт явууллаа. Уг хуулийг баталсан өдрөөс нь дагаж мөрдөхийг гишүүдийн олонх дэмжлээ.

Дараагаар нь Шүүгчийн эрхзүйн байдлын тухай хуулийг бүхэлд нь батлах санал хураалт явууллаа. Чуулганы хуралдаанд оролцсон 40 гишүүний олонх нь уг хуулийг батлахыг дэмжлээ. Мөн дагалдах Прокурорын тухай, Авлигын эсрэг тухай хуулийг батлахыг 92.7 хувийн саналаар батлав. 

Ийнхүү ҮАБЗ-ийн зөвлөмжөөр АТГ-ын дарга, шүүх, прокурорын удирдах албан тушаалтныг хугацаанаас нь өмнө чөлөөлөх хууль батлагдсан өдрөөсөө мөрдөгдөж эхлэх юм.

Н.Энх