АН-ын бүлгийн хуралдаан өндөрлөлөө. Хуралдаанаар "Эрдэнэт" үйлдвэр "Стандарт" банкны 40 сая ам.долларыг төлсөн холбогдуулан ажлын хэсэг байгуулан судлахаар болжээ. УИХ дахь АН-ын бүлгийн дарга Д.Эрдэнэбат:
-Засгийн газар Стандарт банкны өрийг дарсан байр сууриа илэрхийллээ. "Эрдэнэт"-ийн Стандарт банкинд тавьсан өр бол Монгол Улсад учирсан бодит хохирол. Энэ мөнгийг татвар төлөгчдийн халааснаас төлж болохгүй, хохирол учруулсан хүмүүсээр төлүүлээрэй гэсэн. 110 гаруй сая ам.долларын өр яригдаж байсан ч 40 сая ам.долларыг төлсөн нь бахархал биш. Бусдын тавьсан өрийг ард түмний халааснаас төлж болохгүй. Ард түмний өмчийг ил цагаан өдөр хулгай хийсэн асуудал үүслээ. Энэ өрийг дарахад хуулийн зөрчил гарсан эсэхийг тодруулна. Эрсдлийн сангийн мөнгөнөөс хэн нэгний хулгайн төлбөрийг төлж болохгүй. Дараагийн төлбөр баяжмалын хэлбэрээр явах юм биш биз. Бусад хохирлыг судлах ёстой. Өр төлбөрийг буй болгосон гэм буруутай этгээдүүдийг нэн даруй тодруулах шаардлагатай. Зуучлагч компанийг судлах хэрэгтэй. Тиймээс бид УИХ-ын гишүүн Б.Пүрэвдоржоор ахлуулсан ажлын хэсэг байгуулан судална хэмээлээ.
Мөн УИХ-ын сонгууль, Улс төрийн намуудын хуулийн төслүүдийг хаврын чуулганаар хэлэлцэн шийдвэрлэх ёстой гэж АН үзсэн байна.
Н.Энх