Япон улсад ирэх онд зуны олимп зохион байгуулагдах энэхүү эгзэгтэй үед "Токио 2020" олимпийн наадмын зохион байгуулах комиссын дарга, Японы Засгийн газрын сайд Ёшитака Сакурада албан тушаалаасаа огцрохоо мэдэгдсэн талаар "CNN" агентлаг мэдээллээ.
Сайд ийнхүү албан тушаалаа огцорсон түүний хэлсэн "мэдрэмжгүй үг"-тэй шууд холбоотой гэнэ. Тэрбээр нэгэн хандивын арга хэмжээнд оролцох үеэрээ 2011 онд Японд олон зуун хүний аминд хүрсэн байгалийн гамшгийн талаар үг хэлжээ.
"Гамшигт нэрвэгдсэн бүс нутгийг сэргээн завсварлахаас илүүтэй тус бүс нутгаас сонгогдсон гишүүдийг дэмжих хэрэгтэй" гэж сайд хэлсэн аж.
Түүний болчимгүй, бодлоггүй үгэнд уурссан иргэд нийгмийн сүлжээгээр дургүйцлээ илэрхийлжээ. Улмаар сайд дээрх үгнийхээ төлөө албан ёсоор уучлалт гуйсан байна.
Тэрбээр өмнө нь олны дургүйцлийг хүргэсэн хэд хэдэн мэдэгдэл хийж байснаараа алдаршсан ба түүнийг "болчимгүй япон самура" гэх зэргээг иргэд даажигнадаг гэнэ.
Ёшитака Сакурада саяхан "Токио 2020" олимпийн үеэр усан спортын төрлөөр медаль хүртэх өндөр магадлалтай тамирчин Рикако Ике "оддын өвчин туссан" хэмээн буруутгажээ.
Учир нь тамирчин цус багадалтын улмаас хэсэг хугацаанд спортоос хөндийрөхөөс болсноо зарласан нь ийнхүү сайдыг эгдүүцүүлэхэд хүргэсэн аж.
Мөн сайд 2016 оны зун дэлхийн II дайны үеэр япон цэргүүдийн бэлгийн боолчлолд байсан охид, бүсгүйчүүдийг "мэргэжлийн биеэ үнэлэгчид" гэсэн юм.
Сакурада мөн улсынхаа кибер аюулгүй байдлыг давхар хариуцдаг ч тэрбээр компьютер огт хэрэглэж үзээгүй гэдэг нь оны өмнө илэрсэн удаатай.
Энэ мэт сайд хүний амнаас гарахааргүй үг унагасан Ёшитака Сакурада өөрийн алдаагаа ухамсарлаж, албан тушаалаасаа огцорлоо.
Б.Дэлгэрцэцэг
Уншиж байна |