“Зүүнбаян рэйфанери” компанийн удирдлага цаг үеийн асуудлаар мэдээлэл хийлээ. Тус компани Туулын бургасыг хядаж, барилга барьсан шүүмжлэлд өртөөд буй юм.
“Зүүнбаян рэйфанери” компани тус газарт Их Тэнгэр аялал жуулчлалын цогцолборыг байгуулж байна. Ингэхдээ тухайн газрын аялал жуулчлалын зориулалтаас хазаагаагүй гэдгээ тус компанийн захирал О.Сайнбаян хэлж байна. Мөн бүх хууль дүрмийн дагуу зөвшөөрөл авч, 2014 оноос ажлаа эхлүүлсэн гэдгээ тэрбээр хэллээ.
БОАЖ-ын сайдын тушаалаар 2017 оны 06 дугаар сарын 20-ны өдөр тухайн газрын эрхийг цуцалжээ. Энэ өдрөөс эхлэн барилгын ажил зогссон байна. Харин “Зүүнбаян рэйфанери” компаниас газрын эрхээ сэргээлгэхээр шүүхэд хандаад буй аж.
Харин Туул голын бургасыг хядсан асуудалд “Зүүнбаян рэйфанери” компанийн захирал О.Сайнбаян “Нийслэлийн Байгаль орчны газарт хандаж, 11 сая 163 мянга 420 төгрөгийг байгаль орчин нөхөн сэргээх төлбөрт төлсөн. Тэгээд бид бургасыг зөөж, өөр газар байршуулах ажил хийсэн. Бид хэнд ч хэлэхгүйгээр бургас огтолсон зүйл байхгүй” гэсэн хариуг өгч байна.
Мөн тэрбээр “Туулын дагуу 1387 иргэн, аж ахуйн нэгж байгууллага газар эзэмшиж байхад яагаад зөвхөн “Зүүнбаян рэйфанери” компанийг яриад байгаа юм бэ. Яагаад давшлаад байгаа юм. Энэ бол улс төр. Туул голын урд талын газар бүгдээрээ улсын тусгай хамгаалалттай. Гэтэл ямар их барилга байгаа билээ. Туул голын хоёр талаар яваад үз. Аялал жуулчлалын зориулалтаар авчихаад орон сууц бариад зараад алга болж байгаа хүмүүсийн эрхийг цуцлаач. Тэр барилгыг буулгаач. Тэгвэл би буулгая” хэмээн гомдож, харамсаж байгаагаа илэрхийллээ.
М.Болд