Индонез улсад энэ сарын 17-нд Ерөнхийлөгч болон парламентын сонгууль зэрэг зохион байгуулагдсан билээ. Индонез улс 260 сая хүн амтай ба эдгээрийн 193 сая нь сонгуулийн насных юм. Нийт иргэдийн 80 хувь нь саналаа өгч, иргэний үүргээ гүйцэтгэсэн байна. 

Тэгвэл сонгуулийн хороонд гэрээгээр ажиллаж байсан 272 ажилтан амиа алдсан талаар Сонгуулийн Ерөнхий хорооноос мэдээллээ.

Ажилчид амиа алдсан нь "хэт их ачааллаас болсон" гэв. Албаныхан "Амиа алдагсад өдөр, шөнөгүй саналын хуудас тоолж, улмаар ажлын ачаалалд орсон. Шалгалтаар тэд эрүүл мэндийн үзлэгт огт хамрагдаж байгаагүй" гэж мэдэгджээ.

Мөн сонгуулийн байруудыг хамгаалж байсан 10 гаруй цагдаагийн ажилтан амиа алджээ.

Индонез даяар 800 мянга гаруй хэсгийн хороо нээгдсэн юм. Сонгуулийн Ерөнхий хороо хохирогчдын гэр бүлд нэг жилийн цалинг нь олгохоор болсон байна.

Ерөнхийлөгчийн сонгуулийн урьдчилсан дүнгээр өнөөгийн Ерөнхийлөгч Жоко Видодо ялалт байгуулжээ. Гэхдээ сонгуулийн эцсийн дүн ирэх сарын 22-нд гарна. 

Б.Дэлгэрцэцэг