Эрдэнэс Тавантолгой ХК-ийн хувьцаа эзэмшигчдийн ээлжит хурал маргааш 10.00 цагт Элит төвд болно. Тус хурлаар 1072 хувьцааны ногдол ашигт хэд төгрөгийг хэрхэн өгөх асуудлыг эцэслэн шийдвэрлэнэ. Үүнтэй холбогдуулан 1072 хувьцаа эзэмшигчдийн эрх ашгийг хамгаалах холбооноос өнөөдөр мэдээлэл хийж, нээлттэй захидал илгээлээ.
Тус захидалд:
-
Эрдэнэс Тавантолгой ХК-ийн ТУЗ-ийн бүрэн бүрэлдэхүүнд гурван үндэслэлээр хариуцлага тооцохыг шаардаж байна. Тухайлбал, тус компанийн ТУЗ Ерөнхий сайд У.Хүрэлсүхийн өгсөн 2019 оны нэгдүгээр улиралд багтаан ногдол ашиг тараах үүргийг биелүүлээгүй.
-
Хувьцаа эзэмшигч иргэдийг хувьцаа эзэмшигчдийн хуралд оролцуулах шаардлагатай байна. Иргэд ногдол ашиг бууруулсан үндэслэлийг асуух хэрэгтэй.
-
Ногдол ашгийн хэмжээг нэмэгдүүлэхийг шаардаж байна. ТУЗ-ийн хоёрдугаар сарын 18-ны хурлын нууц тогтоолоор нэг ширхэг хувьцаанд 25 төгрөгийн ашиг өгөхөөр болсон. 50 сая тонн нүүрс зарсан компани яагаад ийм бага ногдол ашиг өгөх шийдвэр гаргав? Эрдэнэс Тавантолгой ХК 2017 онд 461 тэрбум, 2018 онд 807 тэрбум төгрөгийн ашигтай ажилласан. Сүүлийн хоёр жилд 1.2 их наяд төгрөгийн цэвэр ашигтай ажилласан. Энэ ашгийг 15 тэрбум ширхэг хувьцаанд хуваахаар нэг хувьцаанд 85 төгрөг ногдоно. Тиймээс тус холбоо нэгж хувьцаанд 84 төгрөгийн ногдол ашиг өгөхийг шаардаж байна.
Тус холбооноос Эрдэнэс Тавантолгой ХК-ийн хувьцаа эзэмшигч иргэдийг маргаашийн хуралд идэвхтэй оролцохыг уриаллаа.
М.Болд
| Уншиж байна |