Гачууртын уулзвараас Налайх-Чойрын уулзвар хүртэлх 20.9 км авто замыг шинэчлэн засах ажил явагдаж байна. Олон жил дуншсан, олон ч машиныг “эвдсэн” энэ замыг засч, шинэчилж буйд иргэд сайшаалтай хандаж байгаа.

Харин түр замаар зорчиж буй автомашинуудын тоос иргэдийг эрхгүй арга мухардахад хүргэж байна. Зам харагдахгүй хүртэл хэмжээнд үзэгдэх орчин хязгаарлагдаж, өмнөөс ирж буй автомашин ч үе үе харагдахаа байж шүргэлцчих шахан жолооч нар жинхэнэ ур чадвар, орон зайн баримжаагаа шавхаж байна.

Налайхаас Улаанбаатар хот руу ажил, хичээлдээ явдаг олон хүн бий. Гэтэл Налайхын автобус Төв аймгийн замаар тойрч хот руу нэвтэрч буй тул ажилтай, хичээлтэй хүмүүс өглөө эртлэн гарсан ч яах аргагүй хоцорчихоод байгаагаа учирлана. Жижиг оврын автобуснууд түр замаар Баянзүрхийн товчоогоороо явж буй ч хүнээ багтааж дийлэхгүйд хүрч зарим буудал дээр зогсохгүй өнгөрөх юм.  Автобусанд багталгүй үлдсэн бага насны хүүхдүүд тоосон дунд торойн хоцрох нь хачин өрөвдмөөр. Гэхдээ удахгүй гоё замтай болох тулд хэн хэн нь хаа хаанаа хүлээцтэй, тэвчээртэй хандаж ажил, амьдралаа болгоод л явна.

Гэвч түр замын шороо, тоос асуудал дагуулж байна.

Хүүхдийн гуурсан хоолойн багтраа өвчний 80 хувь нь зөвхөн гэрийн тоосноос үүсдэг болохыг тогтоосон байдаг. Гэтэл Налайхын замын нарийн ширхэгтэй тоосонцороор өдөр бүр амьсгалж буй хүүхдүүдийн эрүүл мэнд зайлшгүй анхаарал хандуулах хэрэгтэй байна.

Улаанбаатар хот дахь тоосжилтын хэмжээ олон улсад зөвшөөрөгдөх дээд хязгаараас 2-3 дахин давсан үзүүлэлттэй байдаг. Дулааны улиралтай зэрэгцэн хуурайшилтын үе эхэлж тоос, шороо ихээр босч агаар бохирдож байгаа энэ үед Налайхын зам засварын ажилтай холбогдуулан шорооон замаар түр зорчих болсон нь тоосжилтыг улам ихэсгээд байна.

Түр замын шороо, тоосыг зохицуулах үүднээс өдөрт тус замыг хоёр удаа усална хэмээн албаныхан  мэдэгдсэн. Гэсэн ч Налайх чиглэлийн шороон замын тоос, тоосжилт гамшгийн хэмжээнд хүрчихээд байна. Энэ байдлаар Налайхын иргэд намар болтол тэсдэг л байгаа.

Нийслэлийн Засаг дарга бөгөөд Улаанбаатар хотын Захирагч С.Амарсайхан 2019.05.04-ний өдөр Гачууртын уулзвараас Налайх-Чойрын уулзвар хүртэлх 20.9 км авто замыг шинэчлэн засах ажлын явцтай танилцаж түр зам дагуу тоосжилт их байгаа тул зам усалгаа ойр ойрхон хийж байхыг сануулаад, Хот тохижилтын газраас нэмэлтээр усалгааны машин гаргуулахаар болжээ.

БНСУ-д сүүлийн өдрүүдэд агаарын тоосжилт ихэссэнтэй холбогдуулж 15 бүсд онц байдал зарлажээ.

Улмаар ус шүршдэг машинууд тодорхой цагуудад гудамж зам услах, автомашинуудыг хөдөлгөөнд хязгаарлах, ард иргэдээ нийтийн тээвэр хэрэглэхийг уриалан бүхий л боломжтой арга хэмжээг авч байгаа юм байна. Манайх ч бас Налайх чиглэлийн замыг онцгой бүсэд хамруулж  онц байдал зарлавал яасан юм бэ.

Г.Сүрэн