Мэргэжлийн хяналтын Ерөнхий газрын Экспорт, импорт, хорио цээрийн газрын дарга Э.Аззаяа, Н.Баярсайхан тэргүүтэй байцаагч нарын хэргийг шүүхээс хэрэгсэхгүй болгосон билээ. Хилээр түргэн муудах хүнсний бүтээгдэхүүн оруулж ирдэг аж ахуйн нэгжүүдэд зөвшөөрөл өгөхдөө "хясан боогдуулах" замаар ТЭРБУМ шахуу төгрөгийн авлига авсан нь мөрдөн байцаалтаар тогтоогдсон тус хэргийг “Хөөн хэлэлцэх хугацаа дууссан” гэсэн үндэслэлээр ХЭРЭГСЭХГҮЙ болгосон юм.

Тус хэргийг хэрэгсэхгүй болгосон “хэрэг”-ийн ард УИХ-ын гишүүн, Хуульзүйн байнгын хорооны дарга Ш.Раднаасэд байгаа гэх мэдээлэл хэвлэлээр цацагдсан. Түүнийг эрүүгийн хуулийн хөөн хэлэлцэх хугацаанд өөрчлөлт оруулах замаар энэ хэрэгт нөлөөлсөн хэмээн буруутгасан юм.

Харин энэ асуудалд УИХ-ын гишүүн Ш.Раднаасэд ийм тайлбар өглөө. Тэрбээр “Мэргэжлийн хяналтынхан надтай нэг төгсөлтийнхөн, үнэн. Надтай хамт төгссөн 130 гаруй хүнийг хэрэгт холбогдохоор Раднаасэд ард нь байна гэх нь байж боломгүй. Энэ хүмүүс намайг ажиллах нэг жилийн хугацаанд мэргэжлийн хяналтын газар ажиллаж байсан. Тэндээ л байгаа. Мэргэжлийн хяналтын газар ажиллаж байсан 2000 байцаагчийн үйлдсэн хэрэг болгоны цаана Раднаасэд байна гэвэл үүн шиг том гүтгэлэг байж болохгүй. Энэ асуудлаар Раднаасэдийг харлуулах зохион байгуулалттай ажлыг хүний өөрийнгүй хийж байгаа. Манай намаас ч, нөгөө талаас ч хийж байгаа” гэх байр суурийг илэрхийллээ.

Б.Болд