Ерөнхийлөгч Х.Баттулга татварын багц хуулинд бүхэлд нь хориг тавьсан билээ. Татварын багц хуульд олон улсын татварын эрх зүйн актуудад заасан хэм хэмжээнд бүрэн нийцээгүй, дотоодын татварын орлогын суурийг бодитойгоор бэхжүүлэн нэмэгдүүлэх үр дүнд хүрэхээргүй шинэ нэр томьёолол төдий, улмаар хууль үл хэрэгжих нөхцөлд хүргэхүйц сөрөг үр дагавартай, засаж сайжруулбал зохих олон асуудал тусгагдсан байна. Мөн улс орны эрх ашигт хохиролтой, татварын хүрээн дэх авлигын нөхцөл байдлыг улам хүндрүүлэх, Монгол Улсын Үндсэн хууль болон холбогдох бусад хуультай зөрчилдсөн, хүлээн зөвшөөрөх боломжгүй дараах агуулга бүхий зохицуулалтууд тусгагдсан хэмээн үзэж, хориг тавьсан юм.
Харин эрх баригчид Ерөнхийлөгчийн хоригийг хүлээн авахгүйгээ мэдэгдсэн. Тухайлбал, Ерөнхийлөгчийг хориг тавьсаны маргааш Сангийн сайд Ч.Хүрэлбаатар “Хориг үндэслэлгүй учраас хүлээж авах боломжгүй” гэсэн хариуг хэвлэлээр дамжуулж өгсөн. Үүний дараа өөрийн цахим хуудсандаа “Татварын багц хуулинд бүхэлд нь хориг тавихдаа 2006 онд хүчингүй болсон, байхгүй хуулинд хориг тавьчихжээ. Хуулиа уншдаггүй юм гэхэд ядахдаа хуулийн нэрийг нь уншиж баймаар юм” хэмээн шоглонгуй хандсан.
МАН-ын бүлэг ч Ерөнхийлөгчийн хоригийг хүлээн авахгүй гэсэн шийдвэрийг гаргасан. Ингэж эсэргүүцэлтэй тулгарсан Ерөнхийлөгч хориг хэлэлцэх хугацааг 05 сарын 27-ны өдөр хүртэл хойшлуулах саналыг УИХ-ын даргад хүргүүлснээр уг асуудал түр хойш тавигдав.
Харин Ерөнхийлөгч өчигдөр Сангийн сайд Ч.Хүрэлбаатарт зориулан хариу мэдэгдэл гаргажээ. Тус мэдэгдэлд “Сангийн сайд Ч.Хүрэлбаатар олон нийтэд хандан “Ерөнхийлөгчөөс 4 дэх хоригоо хүлээж авлаа, хоригийг хүлээж авах боломжгүй” гэх зэргээр мэдээлэл хийж, хариуцсан яамныхаа нэрээр “хариу тайлбар” гэх зүйл гаргуулан, татварын багц хуульд байгаа ноцтой асуудлуудыг далдлах, УИХ-ын гишүүд, иргэд, олон нийтийг төөрөгдүүлэх оролдлого бүхий мэдээ, мэдээллүүдийг хэвлэл, мэдээллийн хэрэгсэл болон нийтийн сүлжээгээр тарааж байгаа нь төрийн ёсонд нийцэхгүйгээс гадна Ерөнхийлөгчийн болон УИХ-ын гишүүдийн бүрэн эрхэд халдсан, Монгол Улсын Үндсэн хуулийг зөрчсөн нэн зохимжгүй үйлдэл болж байна” гэжээ.
Мөн Сангийн сайдын “Хуулиа уншдаггүй юм гэхэд ядахдаа хуулийн нэрийг нь уншиж баймаар юм” гэсэн шоглоомд “Сангийн сайд, Сангийн яамны зүгээс Ерөнхийлөгчийн Тамгын газрын ажилтны гаргасан энэ зохимжгүй алдааг ашиглан, Ерөнхийлөгч хүчингүй болсон, байхгүй хуульд хориг тавьсан гэх мэтээр олон нийтийг илт төөрөгдүүлэх мэдээ, мэдээллийг санаатайгаар түгээж, Монгол Улсын Үндсэн хууль, Монгол Улсын Их Хурлын чуулганы хуралдааны дэгийн тухай хууль, Монгол Улсын яамны эрх зүйн байдлын тухай хуулиар тогтоосон төрийн дэг ёсыг үл тоомсорлосон үйлдэл хийсэнд мөн харамсаж байна” гэсэн хариуг өгчээ.
Сангийн сайд Ч.Хүрэлбаатарт зориулсан Ерөнхийлөгчийн анхны хориг энэ биш. Ч.Хүрэлбаатарыг Сангийн сайдаар томилсон УИХ-ын тогтоолд хориг тавьснаас эхлэлтэй. Ерөнхийлөгч "Ч.Хүрэлбаатар Сангийн сайдаар томилогдсон даруйдаа төрийн албан хаагчдад гурван зуун мянган төгрөгийн нэг удаагийн тэтгэмж олгох байдлаар тавин таван тэрбум төгрөг тараах санал гаргаж байна.Улс орны эдийн засаг хүнд байгаа энэ үед төсвийн хөрөнгийг үр ашиггүй тарааж улсынхаа эдийн засгийг улам бүр хүндрүүлдэг, хохироодог Сангийн сайдтай байж болохгүй" хэмээн түүний томилгоог хэсэгтээ гацаасан. Үүний дараа 2017, 2018 оны улсын төсвийн хуульд бүхэлд нь болон хэсэгчлэн хориг тавьсан. Дөрөв дэх нь татварын багц болов.
Ерөнхийлөгч, Сангийн сайд хоёрын таарамжгүй харилцаа хориг тавих, түүнд нь өгөх хариу тайлбараар илэрдэг. Ээлжлэн бичиг шидэлцдэг энэ харилцаа энэ бүрэн эрхийн хугацаанд хэдэнтээ давтагдаж, цаашид ч үргэлжлэхийг үгүйсгэх аргагүй.
Б.Болд