БХБЯ-наас Төв цэвэрлэх байгууламжийн олон жил хуримтлагдсан лагийг үнэргүйжүүлэх ажлын явцын талаар өнөөдөр /2019.05.27/ сэтгүүлчдэд мэдээлэл хийлээ.
БХБЯ-ны нийтийн аж ахуйн бодлогын хэрэгжилтийг зохицуулах газрын мэргэжилтэн Д.Анхбат "Улаанбаатар хотод сүүлийн гурван хоногт таагүй үнэр ихээр үнэртэж, иргэдийн амгалан тайван байдлыг алдагдуулаад байна. Шинэ цэвэрлэх байгууламж барих ажлыг эхлүүлэх шийдвэрийг Засгийн газраас гаргасан. Үүний бэлтгэл ажлын хүрээнд олон жил хуримтлагдсан лагийг цэвэрлэх халдваргүйжүүлэх, үнэргүйжүүлэх үүрэг өгсөн. Тэгэхээр сүүлийн өдрүүдэд тархаад буй энэ үнэр нь Улаанбаатар хотын хэмжээнд өдөр тутам гарч байгаа 1200 метр куб түүхий лаг болон лагийг цэвэрлэх халдваргүйжүүлэх ажилтай холбоотой.
Олон жил хуримтлагдсан лагийг цэвэршүүлэх, халдваргүйжүүлэх ажлыг 2016 оноос эхлүүлсэн бөгөөд нийтдээ 700 орчим мянган метр куб лагийг цэвэрлэж, халдваргүйжүүлэх ёстой. Энэ онд гэхэд 2019 онд 339 мянган метр куб лагийг халдваргүйжүүлэхээр ажиллаж байна. 2019 оны аравдугаар сарын 1 гэхэд энэ ажлыг бүрэн дуусгах ёстой. Халдваргүйжүүлэлт хийх явцад тодорхой хэмжээний үнэр гарч салхины хурдаас шалтгаалан Улаанбаатар хотод ихээр үнэртэх явдал гарч байна. Гэхдээ энэхүү үнэр нь өвчин үүсгэхгүй" гэв.
Шинэ цэвэрлэх байгууламжийг 2023 онд ашиглалтад оруулахаар төлөвлөжээ. Ингэснээр өдөр тутам ирж буй 1200 метр куб лаг тав дахин багасч иргэдийг бухимдуулж буй асуудал шийдэгдэнэ гэдгийг албаны хүн хэллээ.
Г.Сүрэн