Төрийн байгуулалтын байнгын хороо хуралдлаа. Хуралдаанаар ҮХЦ-ийн гишүүнд нэр дэвшүүлэх саналыг УИХ-ын дарга Г.Занданшатар танилцуулав. ҮХЦ-ийн гишүүнээр ЗГХЭГ-ын Тэргүүн дэд дарга Г.Баясгалан дэвшүүлсэн юм. Хэлэлцэж байгаа асуудалтай холбогдуулан гишүүд асуулт тавьж, хариулт авав. УИХ-ын гишүүн М.Энхболд:
-Г.Баясгалан даргыг дэмжиж байна. Сайн, зоригтой ажиллаарай. УИХ-ын Тамгын газраас асуухад өмнө нь бичиг ирж байсан уу?
УИХ-ын Тамгын газрын хуулийн хэлтсийн дарга н.Түвшинжаргал:
-ҮХЦ-ийн гишүүн н.Ганзоригийн бүрэн эрхийн хугацаа дууссан бичиг дөрөвдүгээр сард ирсэн. Дэгийн хуулийн дагуу УИХ-ын дарга ҮХЦ-ийн гишүүнд нэр дэвшүүлсэн.
Ийнхүү гишүүд асуулт тавьж, хариулт авсны дараагаар санал хураалт явууллаа. Төрийн байгуулалтын байнгын хорооны хуралдаанд оролцсон гишүүдийн 72.7 хувь саналаар Г.Баясгаланг ҮХЦ-ийн гишүүнээр нэр дэвшүүлэхийг дэмжлээ.
Төрийн байгуулалтын байнгын хорооны дарга Д.Лүндээжанцан:
-Амжилт хүсье. Үндсэн хуулийн шүүхийн олон улсын харьцуулсан онолын чиглэлээр том ном орчуулсан байгаа. Энэ бол ҮХЦ-ийн гишүүн болоход нь туршлага болсон байна. Онол туршлага, хуулийн нарийн мэдлэг хосолсон ажлыг амжилттай хийнэ гэдэгт танд Төрийн байгуулалтын байнгын хороо итгэж байна гэлээ.
ҮХЦ-ийн гишүүнд нэр дэвшүүлэхийг дэмжсэн саналыг УИХ-ын дарга Г.Занданшатар Хуульзүйн байнгын хороонд танилцуулах юм.
Н.Энх
Уншиж байна |