УИХ-ын гишүүн О.Баасанхүү өнөөдөр (2019.06.10) АН-ын зөвлөлийн дарга Д.Эрдэнэбатад албан бичиг хүргүүллээ. Тус бичигт УИХ-ын гишүүн О.Баасанхүү АН-ын зөвлөлд орж, найман гишүүнтэй бүлэг болгон хүчтэй сөрөг хүчин байгуулах саналыг тавьсан байна.
УИХ-ын тухай хуулийн 7.1 дүгээр зүйлд УИХ-ын гишүүн нь нам эвслийн бүлэгт нэгдэн орох эрхтэй гэсэн заалт бий. Үүнийг үндэслэн О.Баасанхүү МАХН-аас гаралгүйгээр АН-ын бүлэгт нэгдэх хүсэлтээ илэрхийлжээ. Тэрбээр намын бүлэгт харьяалагддаггүй учраас ийм хүсэлт илэрхийлэх боломжтой аж.
Тэрбээр ингэж АН-ын зөвлөлд нэгдэх болсноо хоёр шалтгаанаар тайлбарлалаа.
УИХ-д Үндсэн хуулийн өөрчлөлтийг өргөн барьсан байгаа. Энэ үед УИХ-д заавал хүчтэй сөрөг хүчин байх ёстой.
Монгол Улсын иргэд 2016 оны сонгуулиар санал өгөхдөө МАН-д 65 суудал, өөрөөр хэлбэл Үндсэн хуулийг өөрчлөх эрхийг өгсөн. Харамсалтай нь ард түмнээс асуухгүй, өөрсдийн эрх гэж бодоод байна. Тиймээс сөрөг хүчин байгуулж, нэгдсэн байр суурь илэрхийлэх хэрэгтэй.
Түүний энэ сонголтыг МАХН-ын гишүүд дэмжиж байгаа гэнэ.
Б.Болд
Уншиж байна |